«81 мың теңгеге бір күрек сатып алмақшы болған»: өңірлердегі тендерлердің былықтары әшкереленді

Сыбайлас жемқорлыққа қарсы агенттіктің ресми өкілі Данияр Бигайдаров Антикордың брифингі барысында тендерлер кезіндегі жалған бағаларды әшкереледі, деп хабарлады Azattyq Ruhy.

Антикордың ресми өкілі сатып алу мониторингінің қорытындысы жайлы айтты.

 «Жемқорлыңтың алдын алу мақсатында сатып алу бойынша бағаның негізсіз қымбат көрсетілуіне мониторинг жүргізіледі. Агенттік 2023 жылдан бастап 53,8 млрд теңге бюджет қаражатын тиімсіз жұмсаудың жолын кескен. 2024 жылдың бірінші тоқсанында сатып алудағы  12,4 млрд теңге үнемделген. Әсіресе, кеңсе тауарлары мен тамақ, үй-жай сатып алу бойынша асыра бағалау анықталды. Оның ішінде әкімдік пен білім, денсаулық сақтау ұйымдары осыған жол береді. Қонаев қаласында тұрғын үй коммуналдық бөлімі 2,5 млрд теңгеге 4 бу қазандығын сатып алу бойынша конкурс өткізілген. Бағасы 1,3 млрд теңгеге көтерілген, шарт тапсырмасын беруші мен өнім алушы арасында қайта жасалды», - деді Бигайдаров.

Сондай-ақ ол қаңтар айында кадастр пилотсыз ұшу апараттарын 110 млн теңгеге сатып алуды жоспарлағанын айтты.

«Ал мұндай аппарат құны 4 млн теңгеден аспайды. Бағасы қайта қаралып, жалпы үнемдеу сомасы 106 млн теңгені құрады. Ақмола облысында Бараев астық ғылыми-орталығы қаңтарда 12 млн теңгеге, яғни 81 мың теңгеге 150 дана күрек сатып алуды жоспарлаған. Нәтижесінде  81 мың теңгенің күрегі 3200 теңгеге төмендетілген. Антикор 10 млн теңге ақшаны үнемдетті», - деді ол.

Сондай-ақ Данияр Бигайдаров әр облыста болған осындай заңсыздықтарды тізіп айтып берді.