Атырауда сот шешімімен әкесі ұлының оқу ақысын төлеуге міндеттелді

Azattyq Rýhy

Тараптар медиациялық келісімге келді

Атырауда сот шешімімен әкесі ұлының оқу ақысын төлеуге міндеттелді
Фото: Azattyq Ruhy / Әсет Құндақбаев

Атырау облысының кәмелетке толмағандардың істері жөніндегі мамандандырылған ауданаралық сотында оқу ақысын өндіру туралы азаматтық іс қаралды, деп хабарлайды Azattyq Ruhy azh.kz сайтына сілтеме жасап.

Сотта анықталғандай, талап қоюшы Д. мен жауапкер С. арасындағы заңды неке бұзылғаннан кейін ерлі-зайыптылардың кәмелетке толмаған жасөспірім ұлы анасымен бірге тұрған. Талап қоюшы өз талап арызында ортақ ұлдары күндізгі оқу нысаны бойынша Атырау жоғарғы медициналық колледжінің ақылы бөлімінің студенті екендігін, алайда, бүгінгі күні әкесінің алимент бойынша міндеттемелерін өз еркімен орындамағанын көрсеткен.

Осыған байланысты, талап қоюшы жауапкер С.-дан ортақ ұлын оқытуға жұмсалған соманың жартысын өндіруді сұрады. Істі қарау барысында тараптарға татуластыру рәсімдерінің тиімділігі түсіндіріліп, нәтижесінде тараптар медиациялық келісімге келді.

Келісім шарттарына сәйкес жауапкер ұлына оқу ақысын төлеуге міндеттенді. Сот ұйғарымымен медиациялық келісім бекітіліп, іс өндірістен тоқтатылды.

×
Бұл желілік ресурстың ақпараттық өнімдері 18 жастан асқан адамдарға арналған.