Қазақстандықтардың құқықтық сауатын арттыратын жоба іске қосылды

Бүгіннен бастап «Әділдік жолы» РҚБ еліміздің барлық өңірінде заңбұзушылықтардың алдын алып, қазақстандықтардың құқықтық сауаттылығын арттыру мақсатында «Заң үстемдігі» жобасын іске қосты, деп хабарлайды Azattyq Ruhy.

Жобаның негізгі мақсаты – қоғамда сыбайлас жемқорлықтың барлық көріністеріне төзбеушілік ортасын қалыптастыру және де осы процеске ел азаматтарын жаппай тарту.

Бұл жоба Мемлекет басшысы атап өткен «Адал азамат» тұжырымдамасын жүзеге асыру мен қоғамдағы Заң және құқықтық тәртіп үстемдігін қалыптастырудағы нақты қадамдардың бірі болмақ.

«Біз құқықбұзушылық жасау, пара беру немесе әлсізге қолын көтеру туралы ойдың өзін айыптайтын қоғамға айналуымыз керек. Бұл қиын жұмыс, бірақ бұл жолды еңсеруіміз қажет. «Әділдік жолы» командасы 2 жыл бойы белсенді жұмыс істеп, қоғамда құқықтық сауаттылық бойынша олқылықтар бар екеніне көз жеткізді. Осы уақыт аралығында adildik.kz сайты мен 1463 байланыс орталығына түскен 8 мыңға жуық азаматтың өтінішін қарастыра келе, халықтың заң мен ереже туралы білімдерін арттыру арқылы көп мәселені қылмысқа апармай шешуге болатынына сенімдіміз», - деп атап өтті «Әділдік жолы» РҚБ атқарушы директоры Дидар Смағұлов.

Атап айтқанда, «Әділдік жолы» бірлестігінің жұмысының арқасында 1206 тұлға түрлі заңбұзушылық үшін әкімшілік жауапкершілікке тартылып, айыппұл төлеген, 800 млн теңгеден астам қаражат бюджетке қайтарылып, 76 қылмыстық іс қозғалған.

«Заң үстемдігі» жобасына ҚР кез келген азаматы қатыса алады. Әрбір тұрғын сыбайлас жемқорлық фактілері (кез келген саладағы)  мен басқа да мәселелерін 1463 Call-орталығы немесе Adildik.kz сайты арқылы хабарлап, өз сауалдары бойынша құқықтық кеңестер мен көмек ала алады.

«Еліміз болашағына бей-жай қарамайтын барлық азаматтарды сыбайлас жемқорлыққа қарсы күреске белсенді атсалысуға шақырамыз. Әділетті Қазақстанды бізге ешкім дайын күйде алақанымызға салып бермейді, оны өзіміз құрамыз!» – деді Дидар Смағұлов.

Еске салсақ,  «Әділдік жолы» РҚБ 2020 жылдың қарашасында құрылған. Мемлекеттік сатып алу мониторингі аясында 15,1 млрд теңгеге бағаны көтеру және заңнаманы бұзу бойынша 1000-ға жуық фактілер анықталған. Осы және өзге де фактілер бойынша 300-ден астам мемлекеттік орган басшылары мен басқа да тұлғаларға жалпы сомасы 264 миллион теңге айыппұл салынды. Заңды тұлғаларды қосқанда 626 тұлға тәртіптік жауапкершілікке тартылып, ұйғарым шығарылды. Құқықтық кеңес беру және сыбайлас жемқорлық фактілерін анықтау мақсатында 900-ден астам ауылға сапарлар ұйымдастырылды.