Жаңа тұрғын үй бағдарламасы академиялық ғылыммен айналысатын жастарға арналған
1 желтоқсанда Отбасы банкі Қазақстанның жас ғалымдарына кредит беру бағдарламасы бойынша өтінімдерді қабылдай бастады, деп хабарлайды Azattyq Ruhy.
Жаңа бағдарлама туралы Орталық коммуникациялар қызметінде өткен брифингте Отбасы банкінің басқарма төрағасы Ләззат Ибрагимова айтты.
Банк саладағы барлық тетікті зерттеп, арнайы тұрғын үй бағдарламасын әзірлеу туралы шешім қабылдады. Үміткерлер тізімінде Ғылым және жоғары білім министрлігіне қарасты 53 ұйымның жас ғалымдары бар.
«Тоғыз адамның өтініштері мақұлданған. Несиенің ең көп сомасы 20 млн теңгені, қарыз мерзімі 19 жылды құрайды. Бұл жас ғалымдарға өздерінің алғашқы пәтерін сатып алуға және тиісінше Қазақстанда қалып, ғылыми зерттеулерін жалғастыруға мүмкіндік береді. Оның ақысы қолжетімді және несие алушыларға ыңғайлы. Егер ғалым 20 млн теңге сомасын алса, алғашқы сегіз жыл ішінде 155 мың теңге төлейтін болады, ал кейінгі жылдары төлем мөлшері 84 мың теңгеге дейін төмендейді. Осылайша, біз жас ғалымдарды тартамыз және оларды академиялық ғылымымызда қалдырамыз деген үміт бар», – деп атап өтті Л.Ибрагимова.
Айта кетерлігі, жас ғалымдар арасында бағдарламаға деген қызығушылық бар. Әзірге жоба 5 жылға жоспарланған. Аталған жоба Отбасы банкінің таза табысынан қаржыландырылады.
Авторы: Еркежан АЙТҚАЗЫ