Мәжіліс республикалық бюджет туралы заң жобасын қабылдады

Мәжілістің жалпы отырысында Ұлттық экономика министрі Әлібек Қуантыров «2024 – 2026 жылдарға арналған республикалық бюджет туралы» Қазақстан Республикасы заңы жайлы баяндады, деп хабарлады Azattyq Ruhy.

«Елдің 2024 – 2028 жылдарға арналған әлеуметтік-экономикалық даму болжамы енгізіледі.Болжамды қалыптастырудың негізіне мұнайдың бағасы барреліне 80 АҚШ доллары болғандағы базалық сценарий алынды. Болжам бойынша 2024 жылы жалпы ішкі өнімнің нақты өсуі 5,3 пайызды құрайды, кейін 2028 жылы 6 пайызға дейін өседі. 5 жыл ішінде жалпы ішкі өнімнің орташа жылдық өсуі 5,8 пайызды құрайды. Номиналды жалпы ішкі өнім 2024 жылғы 135 трлн теңгеден 2028 жылы 218,5 трлн теңгеге дейін өседі.Экономиканың барлық базалық салаларында оң динамика күтілуде. Шикізаттық емес сектор болжамды өсудің негізгі драйверлерінің біріне айналады», - деді ол.

Министр атағандай, өнеркәсіптегі орташа жылдық өсу қарқыны 2024-2028 жылдары 4 пайызды құрайды.

«Өңдеу өнеркәсібі орта есеппен 4,9 пайыз деңгейінде өседі және тау-кен өнеркәсібінің өсу қарқынынан озып кетеді. Қашаған, Теңіз және Қарашығанақ кен орындарында өндірісті кеңейту есебінен мұнай өндіру 95,4-тен 102 млн тоннаға дейін ұлғаяды. Ауыл шаруашылығының орташа жылдық өсімі 4,5 пайызды құрайды.Инвестицияларды игеру жағдайында құрылыс саласының жоғары өсу қарқыны күтілуде. Нақты сектордағы өндірістің өсуі қызмет көрсету секторының орта есеппен 6,3 пайызға өсуіне ықпал етеді. Ішкі тұтынушылық белсенділік сауда қызметтерінің орта есеппен 7,4 пайызға өсуіне ықпал ететін болады. Көлік саласындағы болжамды өсім орта есеппен 6 пайызды, «ақпарат және байланыс» саласында 7,8 пайызды құрайды. Салаларда экономикалық белсенділікті арттыруға инвестициялық жобаларды іске асыру, нақты сектор мен шағын және орта бизнесті мемлекеттік қолдау жөніндегі шаралар ықпал етеді», - деді ол.

Өз кезегінде Қаржы министрі Ерұлан Жамаубаев бюджеттің бұл параметрлері әлеуметтік және басқа да міндеттемелерді уақтылы орындауға, сондай-ақ Мемлекет басшысының тапсырмаларын сапалы жүзеге асыруға мүмкіндік беретінін айтты.

«Мәжілісте заң жобасы кеңінен талқыланды. Комитеттер мен Жұмыс топтарының 25 отырысы өткізілді. Онда депутаттардың 300-ден астам сауалдарына жауаптар берілді. Барлық фракциялармен етеке жұмыс жүргізілді.«AMANAT» фракциясының кеңейтілген жиналысы өткізілді. Депутаттар көтерген мәселелер, әсіресе өңірлердің қажеттіліктері барынша ескерілді. Нәтижесінде 2,5 трлн теңгеге жуық қаражат маңыздылығына қарай қайта бөлінді. Оның ішінде Үкімет резерві есебінен 56 млрд теңге қосымша қарастырылды. Қорытындылай келе, биылғы заң жобасын талқылауға белсенділік танытқан барлық депутаттарға алғыс білдіреміз. Заң жобасын қолдауларыңызды сұраймын», - деді ол.

Авторы: Аягөз ҚҰРМАШ