Қазақстанда жол-көлік оқиғалары қай өңірлерде көп тіркеледі

Қазақстанда биылғы қаңтар-қыркүйек аралығында 9,9 мың жол-көлік оқиғасы тіркелді, бұл бір жыл бұрынғыдан 3,8%-ға аз, деп хабарлайды Azattyq Ruhy.

Ranking.kz зерттеуінше, жол-көлік оқиғалары көбінесе Алматы қаласында тіркелді: биыл республика бойынша барлық жол апатының 25,9%-ы немесе 2,6 мың оқиға осы мегаполисте тіркелген. Бұл бір жыл бұрынғыдан 2,4%-ға аз көрсеткіш. Сондай-ақ алғашқы үштікке Алматы облысы (961 жағдай, өткен жылғыдан 37,6%-ға азайған) мен Жамбыл облысы (695 жағдай, 39,4%-ға аз) да кіреді.

Ең аз жол-көлік оқиғасы Ұлытау облысында тіркелді: 42 жағдай. Одан кейін Атырау (218 жағдай) және Қарағанды ​​(236 жағдай) облыстары тұр.

Биылғы қаңтар-қыркүйек қорытындысы бойынша елімізде жол-көлік оқиғалары салдарынан 14 мың адам зардап шекті, бұл бір жыл бұрынғыдан 7,1%-ға аз. Олардың ішінде жараланғандар саны 7,8%-ға азайып, 12,3 мың адамды құрады, оның ішінде 7,1 мың ер және 5,2 мың әйел адам бар. Сондай-ақ 2,8 мыңы кәмелетке толмағандар болды, бір жылғыдан 0,7% аз. 6,5 мың адам ауруханаға жатқызылды - бір жыл бұрынғы көрстекіштен 1,1%-ға артық.

«Жыл басынан бері елімізде жол апатынан 1,7 мың адам қаза тапты, бұл бір жыл бұрынғыдан 2,1%-ға аз көрсеткіш. Қайтыс болғандардың 1,2 мыңы – ерлер, 488-і –әйелдер. Олардың арасында 210 адам кәмелетке толмағандар болды, бұл бір жылғыдан 16% көп», - дейді сарапшылар.

Өңірлер бойынша жол-көлік оқиғаларынан ең көп зардап шеккендер Алматыда (2,8 мың адам), сондай-ақ Алматы облысы (1,4 мың адам) және Жамбыл (1,2 мың адам) облысында, ең азы Ұлытауда (67 адам), сондай-ақ Қарағанды ​​және Атырау (әр облыста 362 адам) облыстарында тіркелген.