Астана мен Алматы әкімдіктеріне 25 қазанда митинг өткізуге өтініш түскен жоқ

Астана мен Алматы әкімдіктеріне 25 қазанда митинг өткізуге өтініш түскен жоқ, деп хабарлады Azattyq Ruhy әкімдіктердің баспасөз қызметі.

Желі қолданушылары Tiktok-та Республика күні – 25 қазанға жоспарланған митингілер туралы көптеген видео тарап жатқанын атап өтті.

2022 жылдың 25 қазанында қазақстандықтар Республика күнін еліміздің ұлттық мерекесі ретінде алғаш рет атап өтті.

Республика күнінің тарихы сонау тоқсаныншы жылдардан басталады. 1990 жылы 25 қазанда «Қазақ КСР-нің мемлекеттік егемендігі туралы» декларация қабылданды. Бұл Қазақстанның тәуелсіздік алуына жол ашқан маңызды құжат болатын.

Қазақстанда ұлттық және мемлекеттік мереке күндері ресми түрде демалыс болып жарияланады. Егер мемлекеттік немесе ұлттық мереке демалыс күніне (сенбі, жексенбі) түссе, демалыс күндері бір күнге ұзартылады.

2023 жылы Республика күні сәрсенбіге түсіп тұр. Яғни 25 қазан күні қазақстандықтар демалады.