«119 млн теңге жұмсалған»: Қостанайда екі ай бұрын төселген жаңа асфальт бұзылып жатыр

Қостанайда екі ай бұрын 119 миллион теңгеге төселген жаңа асфальт бұзылып жатыр, деп хабарлайды Azattyq Ruhy тілшісі «Алау» порталына сілтеме жасап.

Шипин көшесінде бұрын-соңды асфальт болмаған. Тұрғындардың талай жылғы өтінішінен кейін екі ай бұрын асфальт жол салынған.

«Мен 2000 жылы осында көшіп келдім. Осыдан екі ай бұрын асфальт төселді. Алайда жолдар қайта бұзылып, көлігіммен кіре алмай қалдым. Үйге келгенде көлігімді қалдырып, жаяу келемін», - дейді қала тұрғыны Ғалия Ибраева.

Тұрғындар жұмыс жүріп жатқан кезде-ақ асфальттің сапасыз төселіп жатқанын білдік дейді.

«Қиыршық тас болған жоқ, құм төселмеді», - дейді ол.

Тұрғындар сапасыз жолға мердігер кінәлі деп санайды. Ал ТКШ бөліміндегілер бұл сөзбен келіспейді.

«Бұл жолға 119 миллион теңге жұмсалды. Асфальт сапасыз салынғаннан емес, топырақтың әсерінен бұзылды. Біз себебін анықтаймыз, қазір нақты айта алмаймын», - дейді ТКШ бөлімінің бас маманы Шыңғыс Омаров.

Шыңғыс Омаровтың айтуынша, «Қостанай су» коммуналдық кәсіпорны үш жыл бойы дәл осы Шипина көшесінде гравитациялық коллекторды қайта құрумен айналысқан.

«Жаңбырдың салдарынан топырақ отырған. Кепілдік міндеттемелері аясында мердігер ұйым олқылықты түзетеді. Өз қаражаты есебінен олар мұның бәрін қалпына келтіруге міндеттеледі. Жұмыс бүгін басталуы керек. Біз мұнда ешкім құлап қалмау үшін қоршау қойдық», - деді «Қостанай су» МКК бас инженері Сергей Кривошилов.

Мұнда асфальт қана емес, жаяу жүргінші жолы да бүлінген. «Қостанай су» бас инженері мердігер бір апта ішінде зақымданған аумақты қалпына келтіретінін айтты.