«Демалушылар қоқысты құм астына тығып кетеді»: Балқаш қаласының әкімі туристердің әрекетін сынға алды

Өткен аптадағы мереке және демалыс күндері Балқашта 20 мыңға жуық адам демалды. Бұл туралы қала әкімі Сапар Сатаев өзінің Instagram парақшасында жазды, деп хабарлайды Azattyq Ruhy.

«Жазғы маусымда Балқаш барлық туристерді қызықтыратын орынға айналады. Мұнда әртүрлі елдер мен қалалардан туристер келеді. 2022 жылдың қорытындысы бойынша қызмет көрсетілген туристердің жалпы саны 67 295 адамды құрады, бұл 2021 жылмен салыстырғанда 33,3%-ға өсті. Бұл сандар жыл сайын артып келеді. Өткен мереке және демалыс күндері Балқашта 20 мыңға жуық адам демалды. Әрине, бұл туризмнің дамуына, қалаға қаржының түсуіне және жергілікті бюджетке салықтар мен төлемдердің түсуіне әкеледі»,- деп жазды қала басшысы.

Алайда әкім демалысқа келген туристердің мәдениетсіздігін сынға алып, келушілерге құлақ қағыс жасады.

«Бірақ, бұның сырт жағы бар - бұл қоқыс пен рұқсат етілмеген қоқыс орындарының үлкен көлемінің пайда болуы. Балқаштың бүкіл жағалауында демалушылардан кейін қалған қоқыс аз емес. Демалушылар қоқыстарын контейнерлерге апара алмай, темекі, бөтелкелерді, майлық және тамақ қалдықтарын құмның астына тығып қояды. Белсенділер, жұмысшылар, еріктілер жағажайды тазарту жұмыстарын үздіксіз жүргізуде. Өткен демалыс күндері Шұбар-Түбек және Тораңғалық ауылдарының жағажай аймағынан 1000 қапқа жуық қоқыс жиналды», - деп жазды Сапар Сатаев.