ШұғылCOVID-19 жұқтырған 16 науқас аса ауыр халде жатыр

Карантин талаптарын орындамағандар жауапқа тартылады – Бас прокуратура

Бас прокурордың орынбасары Дембаев халыққа үндеу жасады

Фото: ҚР Бас прокурордың орынбасары Болат Дембаев

ҚР Бас прокурорының орынбасары Болат Дембаев «Прокуратура туралы» заңның 31-бабы тәртібінде үндеуін жариялады

Бас прокурор орынбасарының айтуынша, 19 наурыздан бастап енгізілетін бірқатар шаралар мен шектеулерді орындамаған адам әкімшілік жауапқа тартылады.

«Нұр-Сұлтан және Алматы қалаларында 2020 жылғы 19 наурыздан бастап карантин режимі енгізілді. Бірқатар шаралар мен уақытша шектеулер белгіленді. Оларды орындамау әкімшілік жауаптылыққа әкеп соқтырады (ӘҚБтК-нің 476-бабы – 10 АЕК айыппұл немесе 15 тәулікке дейін қамаққа алу). Төтенше жағдай кезінде билік өкілінің заңды талабына бағынбағаны үшін қылмыстық жауаптылық көзделгенін (ҚК-нің 379-бабы – 2 мың АЕК айыппұлдан 2 жылға бас бостандығынан айыруға дейін) түсіндіреміз», - деді Бас прокуратура өкілі.

Дембаевтың мәлімдеуінше, карантиннен жалтару фактілері де бар.

«Халық денсаулығы және денсаулық сақтау жүйесі туралы» кодекстің 90-бабына сәйкес, азаматтар медициналық ұйымдардың талап етуі бойынша тексеруден және емделуден өтуге міндетті. Бас мемлекеттік санитар дәрігердің 2020 жылғы 16 наурыздағы қаулысымен стационарлық және үй карантині енгізілді. Оларды іске асыру мақсатында уәкілетті органдар эпидемиологиялық жағдайы қолайсыз елдерден келген адамдарды анықтау, оқшаулау және емдеу бойынша шараларды қамтамасыз етуде. Шектеу іс-шаралары, оның ішінде карантин тұрғындардың және меншік нысанына қарамастан заңды тұлғалардың орындауы үшін міндетті. Алайда карантиннен жалтару, шетелге шығу туралы мәліметтерді және байланыста болған адамдар туралы ақпаратты жасыру фактілері бар», - деді Б. Дембаев.

Талаптарды орындамағандар 10 тәулікке дейін қамаққа алынады.

«Халықтың қауіпсіздігін қамтамасыз ету мақсатында азаматтардан өткізілетін іс-шараларға түсіністікпен қарауды, Денсаулық сақтау министрлігі мен ІІМ қызметкерлерінің заңды талаптарын сақтауды, оларға инфекцияны анықтау мен алдын алуға көмек көрсетуді сұраймыз. Полицияның осындай талаптарына бағынбағаны үшін әкімшілік жауаптылық көзделгенін атап өтеміз (ӘҚБтК-нің 667-бабы - 40 АЕК-ке дейін айыппұл немесе 10 тәулікке дейін қамаққа алу). Сондай-ақ, санитарлық-эпидемиологиялық қадағалау органдарының нұсқамаларын орындамағаны (ӘҚБтК-нің 462-бабының 3-бөлігі – 500 АЕК-ке дейін айыппұл) және санитариялық ережелер мен гигиеналық нормаларды бұзғаны үшін (ӘҚБтК-тің 425-бабы – 5 млн теңгеге дейін айыппұл) әкімшілік жауаптылық белгіленген», - деді ол.

Бұл ретте кәсіпкерлік субъектілеріне қатысты қызметін тоқтата тұру түріндегі жаза қолданылуы мүмкін.

«Егер мұндай әрекеттер абайсызда адамдарды жаппай жұқтыруға немесе адам өліміне әкеп соқса, онда қылмыстық жауаптылық туындайды (ҚК-нің 304-бабы – 2 мың АЕК айыппұлдан 10 жылға бас бостандығынан айыруға дейін). Сонымен бірге шындыққа сәйкес келмейтін мәліметтерді таратпауға және арандатушылыққа берілмеуге шақырамыз. Ағымдағы жағдай туралы шынайы ақпарат уәкілетті мемлекеттік органдардың ресми интернет ресурстарында орналастырылады», - деді Б. Дембаев.