Алматыда қаңтар оқиғасына қатысқан 25 адамға сот үкімі шықты

Azattyq Rýhy

Олар бірнеше бап бойынша сотталды

Алматыда қаңтар оқиғасына қатысқан 25 адамға сот үкімі шықты
Коллаж: Azattyq Ruhy / Нұрсұлтан Жорабаев

Алматыда қаңтар оқиғасына қатысты іс бойынша 25 адамға сот үкімі шықты. Олар бірнеше бап бойынша сотталды, деп хабарлайды Azattyq Ruhy.

Алматы қалалық соттарының баспасөз қызметі мәлім еткендей, 2022 жылғы қаңтар оқиғасы бойынша 25 сотталушыға қатысты қылмыстық іс қаралды.

«Алматы қаласы Бостандық ауданының №2 аудандық сотында қаңтар оқиғасына қатысқан 25 азаматқа қатысты қылмыстық іс қаралды. Олар 2022 жылғы 4-5 қаңтар аралығында Алматы қаласының түрлі аумағында жаппай тәртіпсіздіктерге қатысып, аса ірі мөлшерде ұрлық жасады, тұрғын үй, қызметтік және өндірістік үй-жайларға заңсыз кіріп, ірі залал келтіре отырып көлік құралдарын айдап әкетті, қауіпті өндірістік нысаның аумағына, сондай-ақ арнайы органдар күзететін басқа да нысандарға заңсыз кірді, бұл елеулі залал тигізіп, басқа да ауыр зардаптарға әкеп соқты», - делінген сот хабарламасында.

Айыпталушылар сондай-ақ алдын ала сөз байласу арқылы оқ-дәрі, атыс қаруларын ұрлап әкеткен, төтенше жағдай жарияланған жерде жаппай тәртіпсіздіктер кезінде адамдар тобы алдын ала сөз байласып, билік өкілдерінің денсаулығына залал тигізіп, олардың мүлкін бүлдіргені және жойғаны анықталды. ⠀

Жаза тағайындау кезінде: сотталушылардың кінәларын толық және жартылай мойындауы, бұрын сотталмағандықтары, жеке басы, жас мөлшері, құқық бұзушылық жасағанға дейінгі және одан кейінгі мінез-құлқы, кәмелетке толмаған балаларының болуы, қылмыстық құқық бұзушылықтың қоғамдық қауіптілігінің сипаты мен дәрежесі, қылмыстық құқық бұзушылықты төтенше жағдай кезінде жасауы сияқты мән-жайлар ескерілді.

«Сот үкімі 20 азаматқа Рақымшылық жасау туралы заң қолданылып, 9 айдан 1 жыл 9 айға дейінгі мерзімге шартты жаза тағайындалды. 4 тұлғаға Рақымшылық туралы заң қолданылып, осыған байланысты олар жазадан босатылды. 1 азамат қайтыс болуына байланысты қылмыстық жауапкершіліктен босатылды», - делінген хабарламада.

Үкім заңды күшіне енген жоқ.

×
Бұл желілік ресурстың ақпараттық өнімдері 18 жастан асқан адамдарға арналған.