Кәсіпорынның барлық объектісінде тексеру мерзімі өткен 89 өлшем құралы қолданылып келген
«АрселорМиттал Теміртау» АҚ-на 16,5 млн теңгеден астам айыппұл салынды, деп хабарлайды Azattyq Ruhy Техникалық реттеу және метрология комитетінің баспасөз қызметіне сілтеме жасап.
Қарағанды аумақтық департаментінің барлық қызметкерлері жеті шахта мен «Восточный» орталық байыту фабрикасының қызметін тексеруге жұмылдырылды. Облыс прокуратурасы тағайындаған тексеру барысында барлық 8 объектіде тексеру мерзімі өткен 89 өлшем құралын қолдану фактісі анықталды.
«Осындай өлшеу құралдарының қате нәтиже көрсетуінен жеке және заңды тұлғалардың мүддесін қорғау қамтамасыз етілмеген және бұл жерасты тәсілімен тас көмірін өндіруді жүзеге асыратын қызметкерлердің өмірі мен денсаулығының қауіпсіздігіне тікелей әсер етеді», - деп атап өтті Комитет төрағасы Қуаныш Елікбаев.
Белгілі болғандай, онда өлшеу құралдарына әр түрлі типтегі электроконтактілі манометрлер, техникалық манометрлер, торлы және скиптік көтергіштер, компрессорлық, қазандық, көмір жыныстарының көтерілуі, желдету көтергіштері сияқты учаскелерде қолданылатын термометрлер жатады.
Өлшем бірлігін қамтамасыз ету саласындағы қолданыстағы заңнамаға сәйкес мемлекеттік «метрологиялық бақылау объектілері саналатын өлшем құралдары олардың типі бекітілгеннен немесе метрологиялық аттестатталғаннан кейін және айналысқа шығар алдында, жөндеуден кейін, пайдалану кезеңінде өлшем бірлігін қамтамасыз етудің мемлекеттік жүйесінің тізілімінде тіркелгеннен кейін тексерілетінін атап өткен жөн.
«Қарағанды облысы прокуратурасының ұсынысы мен материалдарының негізінде «АрселорМиттал Теміртау» Қазақстан Республикасы «Әкімшілік құқық бұзушылық туралы» Кодексінің 419-бабы 1-бөлігінің 2-тармағы бойынша әкімшілік жауапкершілікке тартылды», - делінген комитет хабарламасында.
Бұдан басқа, Қарағанды департаменті кәсіпорынға қатысты заңнаманы бұзуға ықпал ететін себептер мен жағдайларды жою туралы жеке ұсыныс енгізді, олар бүгінгі күні жойылды.
«Сондай-ақ тексеріспен «АрселорМиттал Теміртауда» тас көмірді жерасты тәсілімен өндіру кезінде мемлекеттік реттеуге жатпайтын өлшеулер жүргізілетіні анықталды, өйткені өлшеулердің салалық тізбелеріне енгізілмеген. Бұл өлшемдер Қауіпсіздік пен еңбек жағдайларының қауіпсіздігіне тікелей әсер етеді. Жұмыстардың қауіпсіздігін қамтамасыз ету үшін Департамент өлшемдер тізбесін одан әрі қарау және оларды салалық мемлекеттік органдар бекіту үшін кеңейту жөнінде ұсыныстар дайындады», - делінген хабарламада.