Елдегі тәртіпсіздіктен кейін зардап шеккен бизнес шығыны қалай өтеледі?

Президент Қасым-Жомарт Тоқаевтың тапсырмасы бойынша бизнестің залалын өтеу тәсілдері әзірленді. Бұл жұмыс «Атамекен» ҰКП және бизнес өкілдерімен тығыз өзара іс-қимыл жасай отырып жүргізілді. Сондай-ақ, механизм бірінші вице-премьер Роман Склярдың төрағалығымен тәртіпсіздіктер салдарынан болған зардаптарды жою жөніндегі үкіметтік комиссия отырысында айтылды. Бұл туралы Azattyq Rýhy ҰКП-ның баспасөз қызметіне сілтеме жасап хабарлайды.

Бизнеске мемлекеттен келтірілген залалды өтеу процесі қалай жүргізіледі?

1. кәсіпкер өтеу туралы өтінімді қажетті құжаттармен қоса, InfoKazakhstan арқылы жібереді. Өтінімге ЭЦҚ арқылы қол қойылады.
2. өтінімді өңірлік комиссия қарайды.
3. өңірлік комиссия залалды өтеу сомасын жергілікті бюджеттен бөлу туралы шешім шығарады.
4. қаржы жергілікті бюджеттен зардап шеккен кәсіпкердің пайдасына аударылады.

Бұл ретте «Атамекен» ҰКП үкіметтік комиссия залалды өтеу процесі барынша жедел орындалады деген үміт білдіреді.

Өтеуге тиесілі сома қалай есептеледі?

Өтеу сомасының есебі келтірілген залалдың 3 түрі бойынша жүргізіледі:

1. жылжымайтын мүлік бойынша (ғимараттар мен құрылыстар);
2. бүлінген жылжымалы мүлік пен жабдық бойынша;
3. ұрланған тауарлар бойынша.

Бүгінде бизнес барынша залалды өтеу сомасын объектив, расталған және тез анықтайтын әдісін талқылап жатыр.

«Бағалаушылардың жұмыс тәртібі: мерзімі, рөлі, әрекет алгоритмі анықталады. Соңғы күндері мессенджерлерде «бағалау компаниялары бұл жұмысқа тартылмайтыны, сондықтан оларға кәсіпкерлермен бағалау шартын жасамауға шақыратын» хабарлама тарап жатыр. Мұндай жалған ақпаратқа жол бермеуіміз керек. Осы мәселе бойынша Әділет министрлігі мен Ұлттық экономика министрлігінен ресми позицияны күтеміз», - делінген ҰКП хабарламасында.

Залалды өтеу туралы шешім қалай шығарылады?

Жақын күндері ҚР Премьер-министрінің бірінші орынбасары Роман Скляр кәсіпкерлерге келтірілген залалды өтеу механизмін қабылдайды. Бұл механизм жоғарыда аталған процедураларды, соның ішінде Өңірлік комиссиялар туралы ережені регламенттейді. Құжаттың жобасын «Атамекен» ҰКП мамандары дайындап, мемлекеттік органдарға жіберіп қойды.

Барлық нормативтік құжат бекітілген соң InfoKazakhstan сайтында қолжетімді болады.

Комиссия құрамына әкімдік, мәслихат, Өңірлік кәсіпкерлер палатасының және қоғамдық бірлестіктердің өкілдері кіруі ұсынылған.

Залалды өтеу туралы шешімді кәсіпкердің өтініші және жоғарыда сипатталған тиісті құжаттар (InfoKazakhstan арқылы берілген) негізінде қаржыландыру көзіне байланысты өңірлік комиссия немесе Қордың комиссиясы шығарады.

Залалды өтеуге өтінім қабылдау қашан және қайда басталады?

Өтінімді қабылдау механизмі бекітілген соң басталады.

Кәсіпкерлерден өтінімдерді қабылдаудың бірыңғай орны InfoKazakhstan платформасы болып белгіленді. Жұмысты іске қосу үшін техникалық мүмкіндік қарастырылған.

«11 қаңтарда жанашыр бизнес өкілдерінің бастамасымен «Күшіміз Бірлікте» – «Сила в единстве» қоры құрылды. Бұл қор зардап шеккен кәсіпкерлерге қаржылай көмек көрсетуге дайындығын білдірді. Қазір қор нақты ережелерді әзірлеп жатыр. Ондағы тәсілдемелер Үкімет комиссиясы бекіткен механизмге сәйкес реттеледі.

Сонымен қатар, кәсіпкерлерге келтірілген залалды өтеу механизмін әзірлеу және бекіту бойынша жүргізіліп жатқан жұмыстардан басқа, «Атамекен» Ұлттық кәсіпкерлер палатасы төтенше жағдай кезінде зардап шеккен бизнесті одан әрі қолдау бойынша Үкіметке ұсыныстар пакетін дайындап жатыр», - делінген хабарламада.