Қазір Бәскелестікті қорғау агенттігі министрлікпен бірге бұл мәселені пысықтап жатыр
Елімізде 2 жарым мыңға жуық дәрі-дәрмек бағасы еркін айналымға жіберілуі мүмкін, деп хабарлайды 31 арнаның «Информбюро» жаңалықтар қызметі.
Өйткені Денсаулық сақтау министрлігінің бұйрығымен бекітілген препараттардың шекті сомасы бекітілген бағадан асып кетсе, дәрілік заттарды жеткізуге, оны саудалауға тыйым салынады.
Қазір Бәскелестікті қорғау агенттігі министрлікпен бірге бұл мәселені пысықтап жатыр. Ал қарапайым халық дәріханалардағы қазіргі бағаның өзі қалтамызды қағып барады деп жиі шағымданады. Дәрі-дәрмектің бағасы екі есе қымбаттап кетті деген алматылықтар басымыз ауырып, балтырымыз сыздаса да, дәрігердің тағайындаған дәрілерін толық алмай, өз бетімізше ептеп емделіп жүрміз дейді. Дәріханадағы өскен бағаны көріп-ақ, қан қысымымыз көтеріліп шығады деген көпшілік тағы қымбаттаса қалтамыз мүлдем көтермейді деп отыр.
Қазақстан импортқа тәуелді. Еліміздегі дәрілердің 88%-ы шетелден келеді, тек 12% өнім өзімізде өндіріледі. Енді бағасы еркін айналымға жіберілуі мүмкін 2 жарым мың препараттың құны қалай болатынын жауапты мекемелер кесіп айта алмайды.
Бәсекелестікті қорғау агенттігі қазіргі қолданыстағы дәрілердің бағасы мемлекеттік реттеу механизмі арқылы жүргізілетіндіктен, бұл фармацевтика нарығының дамуын тежейді деп отыр дейді. Оған қоса, отандық өндірушілерге жаңа инновациялық дәрілерді енгізуге мүмкіндік бермейтінін айтады. Өйткені Мемлекет бекіткен шекті мөлшерден қымбатқа түсетін дәрілерге сұраныс болса да, рұқсат болмаған соң дәріханаларға жеткізілмейді.
«Мемлекеттік реттеудің өз кемшіліктері бар. Нақтырақ айтсақ, бағаны қоюда ашықтық болмайды, дәрілік заттар тізбегі азаяды. Қазір қайта реттеуге үш кезең бойынша көшу талқыланып жатыр. Алдымен, рецептісіз дәрі-дәрмектер, гомеопатиялық, диеталық қоспалар, дәрумендер бойынша қарастырылады. Олардың барлығы да биржадан тыс және еркін сатылымда. Екінші кезеңде – рецепт бойынша дәрі-дәрмектер мен антибиотиктер. Одан кейін мемлекеттік реттеуде қалатындарды қоспағанда, қалған препараттар», - дейді ҚР қаржы нарықтары және басқа салалар басқармасының бас кеңесшісі Светлана Карпова.
Ал әзірге медициналық тегін көмектің және әлеуметтік сақтандырудың шеңберінде онкологиялық науқастар, орфандық аурулар, коронавирустық инфекцияларды емдеуге арналған дәрілер мемлекеттің реттеуінде қала береді.