«Кірпіш зауыттарының көзін құрту керек»: Алматы облысындағы ауыл тұрғындары Президенттен араша сұрады

«Кірпіш зауыттарының көзін құрту керек». Алматы облысындағы Қайназар ауылының тұрғындары осылай шу шығарды. Төрт-ақ мың халық тұратын елдімекенде төрт кірпіш күйдіретін зауыт бар, деп хабарлайды КТК арнасы.

Тұрғындар ауаға ұшқан өндірістік қалдықтарға тұншығып, ауыл ішінде ауру көбейген. Ал жергілікті әкімдік бұл  түйіткілге қатысты өз жауабын берді. Еңбекшіқазақ ауданы Қайназар ауылындағы тұрғындардың бір бөлігіне кірпіш зауыттары көзге шыққан сүйелдей болды. Айта-айта алысып келе жатқанына алты жылдан асты. Өндіріс ошағының зияны болмаса, бізге пайдасы жоқ деп кейіді.

 «Төрт кірпіш зауыты салынған. Санитарлық нормаға кірмейді. Қағаздары, құжаттары дұрыс емес. Оның бәрінде күдіктеріміз бар. Бағана ресми қағаздарды тексеріп, сұрап алсақ, ол жерде айтылған, ауылдың жайылымынан берілген жерлер. Ауылда тұрғаннан кейін малмен күн көру керек қой», - дейді  Қайназар ауылының тұрғыны Берік Дуанбеков.  

Биік қыраттың етегінен бой көтерген зауыттардың жыл сайын жылыстап, оны мүжіп жатқаны көзге ұрып-ақ тұр. Жарты жыл бұрын шу шығарған жұртшылыққа аудандық әкімдік жауап хат жіберген. Төрт зауыттың екеуінің құжаты дұрыс емес екенін олардың өзі мойындаған көрінеді.

Жергілікті округ әкімі Қуат Ақшабаев аталған төрт зауыттың екеуі істемейтінін, қалған екеуі қыстың алдында жұмысын тоқтатқанын жеткізді. Ал заңсыз бой көтерді деген мәселені «нақтылаймыз» деп әңгімені жылы жапты.

Санитарлық талап бойынша зауыттар елдімекеннен кемі 500 метр жерде болуы тиіс. «Бұл ережені де елемей отыр» деген тұрғындар бәрі заң жүзінде шешілуін талап етеді. Көпшіліктің көзіне күйік болған кірпіш зауыттарының ендігі күйі қалай болары, мәселенің я бүк, я шік түсері әзірге белгісіз. Атқамінерлер тұрғындардың талап-арызын «қайта қараймыз» дегенмен, ауыл халқы шенеуніктер бұл істі түлкібұлаңға сала ма деп алаңдайды. Сондықтан базыналарына Президенттің өзі құлақ асып, араша түсуін қалайды.