Тестілеуге кіру кезінде дене қызуы көтерілген тоғыз түлек ҰБТ-ны басқа күні тапсырады
Қазақстанда 123 мыңнан астам талапкер 51 тестілеу пунктінде ҰБТ тапсырды. Оның ішінде 92 458 түлек тестілеуді қазақ тілінде, 30 967 – орыс тілінде, 263 – ағылшын тілінде тапсырды. Ең жоғары балл – 140.
224 түлек тестілеуге кіргізу кезінде аудиторияға тыйым салынған заттарды алып кіруге тырысқаны үшін ҰБТ тапсыру мүмкіндігінен айырылды. Тестілеу ережелерін бұзғаны үшін аудиториядан 563 адам шығарылып, олардың тестілеу нәтижелері жойылды.
ҚР БҒМ Ұлттық тестілеу орталығы талапкерлерді тек өз күштеріне сеніп, академиялық адалдық ережелерін мүлтіксіз сақтауға шақырады. Сондай-ақ әрбір тестіленушінің қимыл-қозғалысы ахуалдық орталықта «бір тестіленуші – бір камера» қағидаты бойынша бақыланатынын ескертеді.
Тестілеуге кіру кезінде тоғыз түлектің дене қызуы көтерілген. Бұл түлектер ҰБТ-ны басқа күні бөлек тапсырады.