Қазақстанның әуе компаниялары 10 айда 7,1 млн жолаушы тасымалдаған

Қазақстанның әуе компаниялары 10 айда 7,1 млн жолаушы тасымалдаған. Бұл мәліметтерді әлеуметтік желіде Азаматтық авиация комитеті таратты, деп хабарлайды Azattyq Rýhy тілшісі.

Комитет таратқан ақпараттарға қарағанда, 7 желтоқсан бүкіл әлемде Халықаралық азаматтық авиация күні ретінде аталып өтеді. Бұл мереке ИКАО-ның 50 жылдығын мерекелеуге байланысты 1994 жылы құрылды. 1996 жылы ИКАО-ның бастамасымен БҰҰ Ассамблеясы БҰҰ жүйесінің аясында 7 желтоқсанды Халықаралық азаматтық авиация күні деп ресми жариялады. 

Халықаралық азаматтық авиация күнін мерекелеудің мақсаты - мемлекеттердің әлеуметтік-экономикалық дамуындағы халықаралық азаматтық авиацияның маңыздылығы туралы бүкіл әлемдік хабардар болуды қамтамасыз ету және арттыру.

«Біздің мемлекет 1992 жылы Чикаго конвенциясын ратификациялау арқылы ИКАО-ның толыққанды мүшесі болды. Қазіргі уақытта 191 мемлекет ИКАО-ға мүше. Өткен жылы Қазақстан авиаторлары жолаушылар ағынының теңдессіз өсу көрсеткішімен жұмыстың жоғары нәтижелерін көрсетті - ағымдағы жылғы 10 айда қазақстандық әуе компаниялар 7,1 млн. жолаушыны тасымалдаған болатын. Бұл 2018 жылдың сәйкес кезеңінің көрсеткішінен 6% - ға артық (6,7 млн. жолаушы). Қазақстан Республикасының әуежайлары ағымдағы жылдың 10 айында 14,8 млн. жолаушыға қызмет көрсетті, бұл 2018 жылдың сәйкес кезеңімен салыстырғанда 9% - ға артық (13,6 млн. жолаушы)»,-делінген хабарламада. 

Сондай-ақ хабарламада соңғы 7 жылда транзиттік жолаушылар саны 45 есеге артқандығы айтылады. Биылғы жылдың қаңтар-қазан айларында транзиттік әуе жолаушылар саны 852 мың адамды құрады, бұл өткен жылдың сәйкес кезеңінің көрсеткішінен 11% – ға артық (2018 ж. - 765 мың) және жыл соңына дейін 1 млн. астам транзиттік әуе жолаушыға жеткізу жоспарлануда. 

Бүгінгі күні ИКАО стандарттарына сәйкес ұшу қауіпсіздігі деңгейі бойынша Қазақстан ТМД елдері арасында 74% көрсеткішімен үшінші орында тұр.