Сондай-ақ коронавирус жұқтырған 1,2 мыңнан астам дәрігер 2 млн теңгеден өтемақы алды
Мемлекеттік әлеуметтік сақтандыру қорынан COVID-19 инфекциясын жұқтырған және вирустық пневмониямен ауырған 1259 медицина қызметкеріне өтемақы төлеНді. Сондай-ақ індеттен қайтыс болған 11 медицина қызметкерінің туыстарына 10 млн теңгеден төлем аударылды. Бұл туралы Еңбек және халықты әлеуметтік қорғау министрлігінің баспасөз қызметі хабарлады.
Өңірлер арасында COVID-19 жұқтыру немесе вирустық пневмониямен ауыру салдарынан ең көп төлем алғандар – Нұр-Сұлтан (251) және Алматы қалаларының (139), Алматы (105), Қарағанды (97) Ақмола (95) облыстарының медицина қызметкерлері.
Айта кетейік, коронавирус инфекциясын жұқтырған немесе вирустық пневмониямен ауырған медицина қызметкерлеріне – 2 млн теңге өтемақы, ал коронавирус инфекциясын жұқтырып немесе вирустық пневмониямен ауырып қайтыс болған дәрігерлердің отбасына 10 млн теңге көлемінде өтемақы төленеді.