Елдегі тұңғыш балалар телеарнасының YouTube-тегі қараламы 1,5 млрд қаралымнан асқан
Бірнеше күннен кейін Қазақстандағы тұңғыш әрі жалғыз балалар телеарнасының ашылғанына 26 жыл толады. Биыл телеарна кішкентай көрермендеріне арналған жобаларына жасанды интеллект құралдарын енгізіп жатыр, деп хабарлайды Azattyq Rýhy.
Телеарна 8 жасқа дейінгі көрермендерге арнап тәулігіне 15 сағат хабар таратады. Қазақ тілді балалар контентінің шекарасы кеңейіп, 2022 жылдың қыркүйек айынан бастап Қырғызстан, 2024 жылдан бері Моңғолия мемлекеттерінің аумағында таралады.
Телеарна директоры Мақпал Үкенованың айтуынша, «Balapan» телеарнасы 2010 жылдан бері қазақ анимациясы саласында жалпы саны 3262 сериядан тұратын 179 жоба ұсынған екен. Сонымен қатар, балаларға арналған 449 тележоба, 3 толықметрлі мультфильм, 30 телехикая мен ситком өндірілді. Бүгінде телеарнаның YouTube арнасына жазылған адамдардың саны 2,6 миллион адамнан, ал бейнематериалдардың жалпы қаралымы 1,5 млрд қаралымнан асқан.
«Ал биыл, 2026 жылғы жаңа маусымда көрерменге 94 бөлімнен тұратын 7 анимациялық жоба, 308 бөлімді қамтитын 10 бағдарлама және 11 бөлімдік 1 сериал ұсынылды. Оларды арасында Мемлекет басшысының қазақы тазыны ұлттық бренд ретінде кеңінен насихаттау жөніндегі тапсырмалары аясында қолға алынған «Құмай тазы. Жаңа достар» анимациялық сериалы, «Кітаптар патшалығы» анимациялық сериалы, сондай-ақ балаларға қаржылық сауаттылықты үйрететін «Теңгетай» мульфильмі бар», - дейді телеарнаның директоры Мақпал Үкенова.
Биыл телеарна туған күніне орай ауқымды концерт өткізбек. 2026 жыл Қазақстанда Цифрландыру және жасанды интеллект жылы болып жарияланғандықтан, әндердің аранжировкасы ЖИ көмегімен жаңаша өңделіп, заманауи үлгіде ұсынылады. «Шарықта, Balapan» кавер-концертіне еліміздің әр өңірінен 400 бала қатыспақ.