Каспий мен Алакөлдің жағасы, Марқакөл мен Зайсан: Қазақстанның алты аймағында тек шетелдіктерге арналған казино ашылады

Үкімет елде казино мен ойын автомат залдары жұмыс істей алатын аумақтарды белгіледі. Бұл казиноларға тек шетелдік азаматтар мен азаматтығы жоқ адамдар ғана кіре алады, деп хабарлайды Azattyq Rýhy .

Үкімет бекіткен тізімдегі өңірлер:

1. Алматы облысының Талғар және Ұйғыр аудандары
2. Маңғыстау облысындағы Каспий теңізінің жағалауы
3. Жетісу облысындағы Алакөл көлінің жағалауы мен Панфилов ауданы
4. Шығыс Қазақстан облысындағы Марқакөл және Зайсан аудандары
5. Батыс Қазақстан облысындағы Бәйтерек ауданы
6. Абай облысындағы Алакөл көлінің жағалауы

Мұндай ойын-сауық орындарына тек шетел азаматтары мен азаматтығы жоқ адамдар кіре алады. Қазақстан азаматтарына казино мен ойын автоматтары залдарына еңбек немесе қызметтік міндеттерін орындауға байланысты ғана кіруге рұқсат бар.

Үкімет басшысы Олжас Бектенов «Казино салынатын аумақтардың тізбесін бекіту туралы» қаулыға 26 тамызда қол қойған. Оның мәтінін 31 тамызда жариялады. Қаулы 11 қыркүйектен бастап күшіне енеді.