«Айыппұл төлеу» туралы SMS-тен сақ болыңыз: алаяқтар қазақстандықтарды жаппай алдап жатыр

Қарағанды облысында жалған айыппұл хабарламаларын жіберетін алаяқтық деректері көбейген, деп хабарлайды Azattyq Rýhy өңірлік полиция департаментінің баспасөз қызметіне сілтеме жасап.

Тұрғындарға «ҚР Жол полициясы департаменті» атынан SMS-хабарламалар келіп, онда көрсетілген сілтеме арқылы айыппұлды шұғыл төлеу талап етіледі.

Полиция департаменті мұндай хабарламаларды алаяқтар таратып жатқанын ескертті. Олардың мақсаты – азаматтардың банк картасы деректерін қолға түсіріп, ақшасын иемдену.

Құқық қорғау органдары тұрғындарды күмәнді сілтемелерге өтпеуге және белгісіз сайттарға банк картасының мәліметтерін енгізбеуге шақырды.

Айыппұлдың бар-жоғын тек ресми мемлекеттік сервистер – qamqor.gov.kz, eGov.kz порталы және банк қосымшалары арқылы тексеруге болады.