Түркістан облысындағы 70 мектептің асханасы балалар үшін қауіпті болған

Түркістан облысының прокуратурасы санитарлық талаптарды бұзған 70 мектептің асханасына талдау жүргізді, деп хабарлайды Azattyq Rýhy.

Прокуратураның мәліметіне сүйенсек, бұл мектептердегі асханаларды мемлекеттік-жекешелік әріптестік аясында кәсіпкерлер жалға алған. Облыстың прокуратурасы тексеру қорытындысынан кейін облыс әкімдігіне акт жіберген.

Сол құжаттың негізінде 50 білім беру мекемесі санитариялық-эпидемиологиялық қызметтің қорытындысын алып, соның арқасында 12 184 бала дұрыс тамақтанатын болған.

«Ал, прокуратура тәртіп бұзған әкімшіліктер мен кәсіпкерлерге қатысты 81 хаттама толтырып, 7,3 млн теңгеге айыппұл салған», - деп хабарлады Түркістан облысының прокуратурасы.

Айта кетейік, бүгін Үкімет отырысында премьер-министр Олжас Бектенов 1 ақпаннан бастап санитарлық-эпидемиологиялық қызметтер мектептерді ескертусіз тексеретінін еске салды.