Nur Otan өңірлердегі үгіт-насихат науқанын Түркістаннан бастады
Бұл туралы партия төрағасының орынбасары Бауыржан Байбек хабарлады
Nur Otan өңірлердегі үгіт-насихат науқанын Түркістаннан бастады.
Бұл туралы партия төрағасының орынбасары Бауыржан Байбек Instagram парақшасында жазды, деп хабарлайды Azattyq Rýhy тілшісі.
«Құрметті достар! Қасиетті Түркістанға ат басын тіредім. Бұл жолғы сапарда көне қаланың қақпасы іспеттес жаңа әуежайға қондық. Заманауи үлгіде салынған әуежай ғимараты еңселі, көркі көз тартады. Аумағы атшаптырым жерді алып жатқан халықаралық әуежай жылына 3 миллиондай жолаушыны қабылдауға қауһарлы екен. Бұл нысан Түркістанды тұтас әлеммен жалғап, киелі өлкенің өрісін кеңейтуге, туристік әлеуетін арттыруға зор серпін беретіні сөзсіз», - деп жазды Бауыржан Байбек.
Оның айтуынша, Тұңғыш Президент Жарлығымен облыс орталығы мәртебесін алған Түркістан шаһары қысқа уақытта түлеп, алып құрылыс алаңына айналды. Жаңа ғимараттар бой көтеріп, сән-салтанаты арта түсті. Солардың бірі – осынау халықаралық әуежай. Жуырда ғана Елбасының өзі оны салтанатты түрде арнайы ашты.
«Нұрсұлтан Назарбаев атап көрсеткендей, «Тарихы бай, тағылымы терең Түркістанның еліміз үшін орны бөлек. Түркістан – қазақ елінің рухани жүрегі». Сондықтан да біз еліміз үшін маңызы зор алдағы сайлау бойынша партиямыздың өңірлердегі үгіт-насихат науқанын түгел Түркі тәу еткен қасиетті қаладан бастауды жөн көріп отырмыз. Ендеше, іске сәт!», - деп жазды ол.
