Айжан Есмағамбетова Ербол Қарашөкеевтің орынбасары болып тағайындалды

Президент Әкімшілігінің келісімімен және Жамбыл облысы әкімінің өкіміне сәйкес, Айжан Серікбайқызы Есмағамбетова Жамбыл облысы әкімінің әлеуметтік мәселелер жөніндегі орынбасары қызметіне тағайындалды, деп хабарлайды Azattyq Rýhy.

Айжан Есмағамбетова – жоғары білікті денсаулық сақтау саласының маманы. Ол:

• 1997 жылы Қазақ мемлекеттік медицина университетін «Санитария, гигиена және эпидемиология» мамандығы бойынша,
• 2005 жылы Қоғамдық денсаулық сақтау мамандығы бойынша,
• 2008 жылы Almaty Management University-де «Денсаулық сақтау менеджменті» бойынша білім алған.

Еңбек жолын 1990 жылы Алматы қаласындағы №7 емханада фельдшер-зертханашы ретінде бастаған. Одан кейін:

• Республикалық санитарлық-эпидемиологиялық станцияда эпидемиолог-дәрігер,
• ҚР Денсаулық сақтау министрлігінің санэпидқадағалау комитетінде жетекші маман, сарапшы, басқарма басшысы,
• ҚР Бас мемлекеттік санитариялық дәрігерінің орынбасары,
• ҚР Тұтынушылардың құқықтарын қорғау агенттігінде және Ұлттық экономика министрлігінде бөлім басшысы,
• Денсаулық сақтау министрлігінде департамент директоры, комитет төрағасының орынбасары,
• Вице-министр және Бас мемлекеттік санитариялық дәрігер лауазымдарында жұмыс атқарған.

2024 жылғы шілдеден бастап Қоғамдық денсаулық сақтау ұлттық орталығының басқарма төрағасы қызметінде болған.

Айжан Есмағамбетованың Жамбыл облысындағы жаңа қызметі – халықтың әлеуметтік әл-ауқатын арттыру, денсаулық сақтау, білім, еңбек және қоғамдық даму салаларын үйлестіру сынды маңызды міндеттерді қамтиды.