Астананың 280 тұрғынына арзан автокөлік әперемін деп алдап кеткен 35 жастағы ер адам ұсталды

Жүздеген адамды алдап, тақырға отырғызған күдіктіні астаналық полицейлер ұстады деп хабарлайды қалалық Полиция департаментінің баспасөз қызметі.

2021 жылдың қыркүйек айынан бастап «Nur-AvtoKz» ЖШС деп тіркелген компания басшысы жергілікті тұрғындарға нарықтағы құнынан арзан бағада автокөліктер сатып алып беремін деп, ақшаларын жинап алған. 45 жұмыс күнінде көлікті жеткіземін деген ер адам ұшты-күйлі хабарсыз кеткен. Алданғандар саны – 280 адам. Оларға келтірілген шығын – 3 млрд теңгеден асады.

Жүздеген адамнан арыз түскеннен кейін полиция 35 жастағы күдіктіні халықаралық іздеуге берді. Күні кеше ол ұсталып, Ақтау қаласында қамауға алынды. Күдіктінің үстінен алаяқтық бабы бойынша іс қозғалған.