«Жээнбековтің қазір президенттіктен кетуге құқығы жоқ» – Отынбаева

Қырғызстанның экс-президенті Роза Отынбаева қазіргі ел президенті Сооронбай Жэннбековпен кездескенін мәлімдеді. Сондай-ақ экс-президент Жээнбековтың қазір президенттіктен кетуге құқығы жоқ екенін, қайта қиын сәтте халыққа қорған болу керек екенін айтқан.

«Оған қазір кетуге болмайтынын айттым. Ең алдымен, Сооронбай Жээнбеков республикаға, мемлекетке, қырғыз халқына адал қызмет етуге ант берді. Қазір ол керісінше, еңсесін тіктеп, бәрімізге қорған болуы керек», - дейді экс-президент.

Отынбаеваның айтуынша, президенттің рөлі осындай қиын жағдайда бұрынғыдан да маңызды болмақ. Президент берген уәдесінде тұрып, барлық мәселені заң аясында реттеуге күш салуы керек.

Еске салайық, Қырғызстанда 4 қазанда өткен парламенттік сайлаудың қорытындыларымен келіспейтін жаппай наразылық басталды. Осыдан бір апта бұрын басталған Бішкектегі жаппай тәртіпсіздік әлі жалғасып келеді.