Мемлекеттік күзет қызметі бастығының орынбасары тағайындалды

Бүгін Мемлекет басшысының өкімімен Ардақ Әшімбекұлы ҚР Мемлекеттік күзет қызметі бастығының орынбасары – Айрықша мақсаттағы күштердің қолбасшысы болып тағайындалды.

Ардақ Әшімбекұлы 1977 жылы 1 мамырда дүниеге келді. 1995 жылы ҚР Ұлттық қауіпсіздік комитеті Шекара әскерлерінің әскери институтына түсіп, 1999 жылы «бөлімшелердің қызметтік-жауынгерлік іс-әрекеттерін басқару» мамандығы бойынша бітірген. Сондай-ақ 2014 жылы Қазақ гуманитарлық заң университетін «құқықтану» мамандығы бойынша тәмамдаған.

1999-2001 жылдары ҚР Республикалық ұланының қатарында офицерлік лауазымдарда болған.

2001-2006 жылдары ҚР Президенті Күзет қызметінде түрлі офицерлік басшылық лауазымдарда қызмет атқарған. 2006 жылдан Қызметтің әртүрлі құрылымдық бөлімшелерін басқарған.

2013 жылдан ҚР Президенті Күзет қызметі бастығының бірінші орынбасары – Президенттің қауіпсіздік қызметінің бастығы болды.

2014 жылдан ҚР Мемлекеттік күзет қызметі бастығының орынбасары – Қазақстан Республикасының Тұңғыш Президенті – Елбасының қауіпсіздігі қызметінің бастығы қызметіне тағайындалды.

2019 жылы ҚР  Мемлекеттік күзет қызметінің басшысының бірінші орынбасары – Қазақстан Республикасы Тұңғыш президенті – Елбасы Күзет қызметінің басшысы болды.