Сенат сайлауында игерілмей қалған қаражат бюджетке қайтарылады – ОСК

ОСК төрағасының орынбасары Константин Петровтың айтуынша, хаттама негізінде сайлау Қазақстанның 14 облысында, Нұр-Сұлтан, Алматы және Шымкент қалаларында өтті деп танылған.

«3069 таңдаушының 2889-ы немесе таңдаушылардың жалпы санының 94,1 пайызы дауыс беруге қатысты. Сайлау бюллетеньдерінің жалпы санынан 15 бюллетень жарамсыз деп танылды», - деді ол.

Ортсайлауком хатшысы Сәбила Мұстафина Парламент Сенатының депутаттығы үшін әрбір кандидатқа республикалық бюджеттен сайлауалды үгіт жүргізуге қаржы көзделгенін хабарлады. Алайда, өңірлердегі эпидемиологиялық жағдайға байланысты бұл қаражат толық пайдаланылмағандықтан, игерілмеген қаражат бюджетке қайтарылмақ.

ҚР ОСК төрағасы Берік Имашев бұл сайлау науқанының ерекшелігі ретінде әйелдердің саяси белсенділігі артқанын атап өтті. Яғни, сайланған 17 депутаттың 5-і әйелдер, бұл 29,4%-ды құрайды. 2014 және 2017 жылдардағы сайлауларда бұл көрсеткіш тек 6% болған.

Жергілікті мәслихат депутаттарының жасырын дауыс беру нәтижесі бойынша 17 өңірден Жоғарғы палата мандатына ие болған депуттардың тізімі мынадай:  

• Ақмола облысынан – Бекенов Нұрлан Жексембайұлы, 1961 жылы туған, Ақмола облысы бойынша Тексеру комиссиясының төрағасы;
• Ақтөбе облысынан – Қаниев Бауыржан Нұралыұлы, 1958 жылы туған, Ақтөбе облысы Шалқар ауданының әкімі;
• Алматы облысынан – Дүйсембинов Сұлтан Мырзабекұлы, 1959 жылы туған, Алматы облыстық мәслихатының хатшысы;
• Атырау облысынан – Лұқпанов Сағындық Есенғалиұлы, 1960 жылы туған, «Kazakhstan Petrochemical Industries Inc.» ЖШС басқарушы директоры-басқарма мүшесі;
• Шығыс Қазақстан облысынан – Булавкина Ольга Александровна, 1972 жылы туған, Бородулиха ауданының әкімі;
• Жамбыл облысынан – Орынбеков Бекболат Серікбекұлы, 1957 жылы туған, Жамбыл облысы әкімінің бірінші орынбасары;
• Батыс Қазақстан облысынан – Рысбекова Ләззәт Тұяқбайқызы, 1976 жылы туған, «Орал гуманитарлық колледжі» ЖМ қаржы директоры;
• Қарағанды облысынан – Ершов Сергей Михайлович, 1960 жылы туған, Қазақстан Республикасы Парламенті Сенатының депутаты;
• Қостанай облысынан – Карплюк Сергей Алексеевич, 1968 жылы туған, Қостанай облысы әкімінің орынбасары;
• Қызылорда облысынан – Әлназарова Ақмарал Шәріпбайқызы, 1971 жылы туған, «Nur Otan» партиясының облыстық филиалы төрағасының бірінші орынбасары;
• Маңғыстау облысынан – Алдашев Сүйіндік Тасеменұлы, 1963 жылы туған, «Қаражанбасмұнай» АҚ бірінші вице-президенті;
• Павлодар облысынан – Нұхұлы Алтынбек, 1962 жылы туған, Павлодар мемлекеттік педагогикалық университетінің ректоры;
• Солтүстік Қазақстан облысынан – Перепечина Ольга Валентиновна, 1967 жылы туған, Қазақстан Республикасы Парламенті Сенатының депутаты;
• Түркістан облысынан – Бектаев Әли Әбдікәрімұлы, 1962 жылы туған, Қазақстан Республикасы Парламенті Сенатының депутаты;
• Нұр-Сұлтан қаласынан – Күрішбаев Ақылбек Қажығұлұлы, 1961 жылы туған, «С.Сейфуллин атындағы Қазақ агротехникалық университеті» АҚ басқарма төрағасы;
• Алматы қаласынан – Мәкежанов Сұлтанбек Алмасбекұлы, 1961 жылы туған, Алматы қаласы Медеу ауданының әкімі;
• Шымкент қаласынан – Қапбарова Айгүл Жарылқасынқызы, 1975 жылы туған, Қазақстан Республикасы Парламенті Сенатының депутаты.

Абай Сейфулла, Нұр-Сұлтан