Қазақстан Кореямен сирек металдарды терең өңдеу жобаларын іске асыруды ұсынды – Тоқаев
Мемлекет басшысы Қасым-Жомарт Тоқаев «Орталық Азия – Корея Республикасы» бизнес-саммитіне қатысты
Сеулде өтіп жатқан «Орталық Азия – Корея Республикасы» бизнес-саммитінде Президент Қасым-Жомарт Тоқаев Қазақстан минералдар мен сирек кездесетін металдар кеніне бай екенін жеткізді, деп хабарлайды Azattyq Rýhy.
Мемлекет басшысы аса маңызды материалдар саласындағы серіктестікке назар аударды.
«Біз Корей Үкіметі стратегиялық басымдыққа ие ресурстар деп таныған мыс, хром, титан және басқа да элементтерді өндіреміз. Ал Кореяның озық технологияны өркендетуде мол тәжірибесі бар. Осыны ескеріп, геологиялық барлау, кен игеру, аса маңызды материалдарды терең өңдеуге қатысты толық циклді инвестициялық жобалардың тізімін жасақтауды ұсынамын», – деді Тоқаев.
Президент көлік байланысын кеңейту мәселесін өте өзекті деп санайды. Осы орайда, Орталық Азияның географиялық тұрғыдан оңтайлы орналасуы тұтас Еуразияның көлік-логистика жүйесін нығайтуға мол мүмкіндік береді.
«Бұл істе Транскаспий халықаралық көлік бағытының маңызы зор. Оның басым бөлігі Қазақстан аумағымен өтеді. Бүгінде Азия мен Еуропа арасындағы құрлық арқылы тасымалдың 85 пайызға жуығы аталған бағдарға тиесілі. Өткен жылы Орта дәліз бойымен контейнерлік тасымал көлемі 36 пайызға көбейді. Биылғы 8 айда 18 пайыз шамасында айтарлықтай өсім көрсетті. Алдағы екі жылда бағдардың өткізу қабілетін 6 миллион тоннадан 10 миллион тоннаға дейін ұлғайтуды жоспарлап отырмыз. Корей компаниялары осы бағыт бойындағы инфрақұрылымдық жобаларды ілгерілетуге атсалыса алады. Қазақстан Үкіметі корей серіктестерімізге арналған инвестициялық жобалар портфелін жасақтауда», – деді Қасым-Жомарт Тоқаев.
