Оның айтуынша, бұл өте өзекті мәселе
Мемлекет басшысы Қасым-Жомарт Тоқаев Үкімет пен Парламентке бір ай ішінде ауыл әкімдерінің мәртебесіне қатысты ұсыныс әзірлеуді тапсырды, деп хабарлайды Azattyq Rýhy.
Айта кетейік, бүгін Астанада ауыл әкімдерінің диалог-платформасы өтіп жатыр.
«Мемлекеттік қызмет жүйесіндегі ауыл әкімдерінің мәртебесі туралы мәселені айналып өте алмаймыз. Бұл – өте өзекті дүние. Аталған ұсыныс бұған дейін де бірнеше рет көтерілгенін, тіпті, Президент Әкімшілігіне тиісті өтініштер түскенін жақсы білемін. Мемлекеттік қызметшілердің санаттарын нақты белгілеу керек. Үкімет Парламентпен, Мемлекеттік қызмет істері агенттігімен осы мәселелерді жан-жақты қарастырып, бір ай ішінде өздерінің ұсыныс-пікірлерін беруге тиіс. Содан соң шешім қабылданады», - деді президент.
Президент атап өткендей. ауыл әкімдіктерінің қызметкерлерін қолдауға ерекше көңіл бөлген жөн.
«Әкімдіктерде, әсіресе, ауыл әкімдіктерінде бұрын жұмыс істеген немесе қазір де еңбек етіп жүрген азаматтар мұны мемлекеттік қызметшінің нағыз өмір мектебі деп бекер айтпайды. Бұл баршаға түсінікті. Өйткені әкімдік қызметкерлері билік пен бұқара арасында сенімді әрі сындарлы диалог жүргізуді меңгеріп, нағыз басқару машығын жетілдіреді. Сол себепті ауыл әкімдіктері қызметкерлерінің жұмыс істеуіне, олардың кәсіби тұрғыдан өсуіне жағдай жасау маңызды деп санаймын», - деді Тоқаев.