Нұр-Сұлтанда мүгедек жандарды жұмыспен қамтып отырған дәрігер 42 500 теңгеге қатысты әділетсіздікке қынжылады

Нұр-Сұлтан қаласындағы әлеуметтік жобалардың бірі – үшінші топтағы мүгедек жандар жұмыс істейтін «Emoji» дәмханасы карантин кезінде шығынға батқан. Әлеуметтік жобаның негізін қалаған кәсіпкер Азамат Базылов мүгедек жандар жұмысынан айырылмас үшін өзінің дәрігер ретінде алған жалақысын кәсіпке салып отырған.

Azattyq Rýhy тілшілеріне сұхбат берген ол мүмкіндігі шектеулі жандармен қалай тіл табысып, олардың карантин кезінде 42 500 теңге көлеміндегі жәрдемақыдан неге айырылғанын айтып берді.

«Карантин кезінде бизнестің тоқтауына байланысты табыс азайды. Содан ойлана келе, кедергіні мүмкіндікке айналдырып, тамақ жеткізу қызметін іске қостық. Қазір ақырындап тапсырыс көбейіп келеді. Енді карантин жеңілдеген соң, бұрынғы жұмысымызға ораламыз деген үміт бар. Сол кезде де табыс көбейер», - дейді Азамат Базылов.

Азамат Базылов елдегі шектеу шаралары кезінде мемлекет шағын бизнеске ғана қолдау білдіргенін, ал олар сияқты қоғамдық қорлар мен орта кәсіп иелері жеңілдіктерден құр қалғанын айтады.

«100% салық төлеп тұрдық, өйткені, жеңілдік шағын кәсіпкерлерге, яғни жеке кәсіпкерлерге ғана жасалады екен. Салықты уақытында төлей алмасақ та, 100% төледік», - деп мәлім етті ол.

Азамат Базылов осындай қиындықтарға қарамастан, ұжымдағы адамдардың тым болмағанда, тең жартысын карантин кезінде табыссыз қалдырғысы келмеген. Ол қызметкерлері үшінші топтағы мүгедектігі барына қарамастан, өте ашық, бауырмал екенін айтады. Айта кетейік, «Emoji» дәмханасында құлағы естімейтін, ыммен сөйлесетін жандар жұмыс істейді.

«Мен бұл кісілермен оңай тіл табысамын. Көп адам мүгедек жандармен сөйлесу қиын дейді, олар өте агрессивті болады дейді. Бірақ олар агрессивті емес, олар бала сияқты. Яғни, тез ашуланады, тез басылады. Және ең өкініштісі, көп адам олардың осы мінезін пайдаланып, алдап кеткісі келіп тұрады», - дейді Азамат.

Азамат Базылов ашқан әлеуметтік жобада сондай 16 адам жұмыс істейді. Карантин кезінде шығынға батқан дәмхана иесі олардың жартысын ақысыз демалысқа жіберуге мәжбүр болған. Бірақ керек құжаттарының бәрін рәсімдеп, 42 500 теңге жәрдемақы төлеуге өтініш берген. Алайда, мұндағы қызметкерлердің ешқайсысына біржолғы төлем берілмеген.

«Карантин салдарынан қызметкерлердің тең жартысын ақысыз демалысқа жіберуге мәжбүр болдым. Жалпы, 16 адам жұмыс істейді, соның сегізін ақысыз демалысқа жібердім. Қазір 4/4 режимі бойынша ауысыммен жұмыс істеп жатыр. Қалған сегіз адам уақытша жұмыссыз. Өйткені, тек жеткізу қызметі болғаннан кейін даяшылардың жұмысы тоқтады. Қиын кезде ақысыз демалысқа кеткен сегіз қызметкердің құжатын толық рәсімдеп, оларды шынымен демалысқа жібергенімді, тауып отырған табысынан айырылғанын растап, құжаттарын бердім. Бірақ олар мүгедектігіне байланысты зейнетақы алып отырғандықтан, ешқайсысына 42 500 теңге төлем берілмеді. Ал зейнетақылары шамамен, 32 мың теңге шамасында», - дейді Базылов.

Азамат Базыловтың айтуынша, бұл әлеуметтік жоба былтыр басталған.

«Шынын айтайын, әлеуметтік бизнес болғандықтан көп пайда тапқан жоқпыз. Бұрын да табысымыз «нөлдің» шамасында еді, коронавирус инфекциясына байланысты тіпті шығынға батып кеттік. Жоба мүлде тоқтап қалмасын деп, дәрігер мамандығымнан түсетін жалақымды осы бизнеске құйып отырмын. Бірақ үмітіміз зор», - деді Азамат Базылов.

Кенжекей Тоқтамұрат, Нұр-Сұлтан