Қазақстанның бірнеше қалаларынан кіріп-шығуға тыйым салынады деген ақпарат тарап кетті
Бүгін әлеуметтік желілер мен чаттарда Нұр-Сұлтан,Алматы, Шымкент, Қарағанды, Павлодар және Екібастұз қалаларынан шығуға тыйым салынады және 30 маусымнан 1 шілдеге қараған күні түнгі сағат 00.00 бастап, Қазақстан күшейтілген карантинге көшеді деген ақпарат тарап жатыр. Сондай-ақ, таралған ақпаратта барлық сауда орындары жабылып, 65 жастан асқан азаматтар үйінен шыға алмайды деген мәлімет айтылған. Үкіметтің баспасөз қызметі бұл ақпараттың фейк екенін хабарлап отыр.
«Әлеуметтік желілерде Ведомствоаралық комиссия бекіткен қосымша шектеу шараларын енгізу туралы хабарлама тарауда. Мессенджерлерде тараған бұл хабарлама FAKE және шындыққа сәйкес келмейді. Тек қана ресми дереккөздерге сүйенуді сұраймыз»,-деп хабарлады Үкіметтің баспасөз қызметі.
Айта кетейік, бүгін Денсаулық сақтау министрі Алексей Цой Үкімет коронавирус инфекциясына қатысты жағдайды тұрақтандыру үшін жуық арада тиісті шешім қабылдайтынын мәлім етті.