Тағы да Талғар: 14 жастағы бозбаланы жоғары сынып оқушылары ұрып өлтірген

Алматы облысында 14 жастағы жасөспірім қаза тапты. Марқұмның ата-анасының айтуынша, баланы жоғары сынып оқушылары қатыгездікпен ұрып-соққан. Полиция қылмыстық іс қозғағанымен, туыстары оның бабы дұрыс емес деп есептейді. Бұл туралы Azattyq Rýhy агенттігі Almaty.tv-ға сілтеме жасап хабарлайды.

Оқиға қалай болды?

Оқиға 13 қыркүйек күні кешкі уақытта болған. Туыстарының айтуынша, Әлихан серуендеу үшін сыртқа шыққан, алайда арада бір сағат өткеннен кейін ес-түссіз күйде табылған. Оқиға орнына жеткен әкесі ұлының денесінен жарақат іздерін көрген. Куәгерлер болса «баланың өзінен өзі құлап қалғанын» айтқан.

«Мен жүгіріп жеткенімде баламның қасында он шақты адам тұрды. «Не болды?» деп сұрағанымда, олар «Балаңыз еш себепсіз өзінен өзі құлап қалды» деп жауап берді», – деді қаза тапқан баланың әкесі Данияр Нұрғалиев.

Марқұмның туыстары не дейді?

Жақындары Әлиханның соққыға жығылғанына сенімді. Әкесінің айтуынша, дүкен камерасынан түсірілген видеода бір топ жоғары сынып оқушысы баланы тоқтатып, қараңғы көшеге қарай ертіп кеткені анық көрінеді.

«Біз баланы жансақтау бөліміне жеткізіп, есінен танып қалған себебін сұрағанымызда, дәрігерлер оның соққы алғанын айтты. Менің ойымша, олар оны әдейі қараңғы көшеге апарған. Тіпті күдіктілердің өз достарына «Қазір Әлиханды ұстап алып, ұрамыз» дегенін естігендер бар», — деді Данияр Нұрғалиев.

Полицияның мәлімдемесі

Талғар аудандық полициясы қылмыстық іс қозғады. Бір жасөспірім ұсталған. Марқұмның туыстары істі қайта саралауды және барлық қатысы бар адамды жауапқа тартуды талап етеді.

«Кәмелетке толмағанға дене жарақатын салып, оның өліміне әкелген факті бойынша полиция қызметкерлері қылмыстық іс қозғады. Күдікті кәмелетке толмаған жасөспірім ұсталып, уақытша ұстау изоляторына қамалды. Сот шешімімен оған қамауға алу түрінде бұлтартпау шарасы қолданылды», – деді Алматы облысы ПД ресми өкілі Ернар Сайділдин.

Айта кетейік, 2024 жылдың 4 қазанына қараған түні Шерзат Полатты бір топ адам ұрып өлтірген болатын. Оның ісі бойынша сот үкімі жарияланған. Басты күдікті болған Абзал Шынасыл 23 жылға сотталған. Өзге күдіктілерге қатысты сот үкімі:

• Равиль Сакиев – 293-бап 3-бөлігі (бұзақылық), 99-бап 2-бөлігі, 24-бап 3-бөлігі (адам өлтіруге оқталу) бойынша 20 жылға сотталды.
• Азамат Тоқтаубаев – 293-бап 3-бөлігі (бұзақылық), қосымша 188-бап (ұрлық) бойынша бұрынғы соттылықтарын ескере отырып, 15 жылға бас бостандығынан айырылды.
• Нұрқиас Ілиясов – 293-бап 3-бөлігі (бұзақылық), бұрынғы соттылығына байланысты 9 жылға сотталды.
• Шыңғыс Белғожаев – 293-бап 3-бөлігі (бұзақылық) бойынша 7 жылға сотталды.
• Дархан Әскентай – 293-бап 3-бөлігі (бұзақылық) бойынша 7 жылға бас бостандығынан айырылды.
• Нұрбол Тоқтаубаев – 293-бап 3-бөлігі (бұзақылық) бойынша 7 жылға сотталды.
• Дидар Қалиахмет – 293-бап 3-бөлігі (бұзақылық) бойынша 7 жылға бас бостандығынан айырылды.
• Думан Ысқақ (кәмелетке толмаған) – 434-бап (ауыр қылмыс туралы хабарламау) бойынша 1 жыл 6 айға сотталды.