Қазақстандықтар жеміс-жидек сатып алуды азайтқан – зерттеу

Қазақстандықтардың азық-түлік тұтыну құрылымында соңғы жылдары оң өзгерістер байқалады — сүт өнімдері мен етке сұраныс артып келеді, алайда тәттілер әлі де ең көп сатып алынатын тауарлардың бірі болып отыр, деп хабарлайды Azattyq Rýhy Saudata-ға сілтеме жасап.

Тәттілер мен сусындар көш бастап тұр

Аналитиктердің мәліметінше, кондитерлік өнімдер қазақстандықтардың сатып алу құрылымында әлі де бірінші орында тұр.

«Кондитерлік өнімдер супермаркеттердегі орташа тұтыну чегінің 15,7%-ын құрайды. Екінші орында – сусындар (10,4%), ал үшінші орында – ет өнімдері (10,3%). Ал сүт өнімдері жалпы сатып алу көлемінің 8,8%-ын ғана иеленеді», – делінген зерттеуде.

Тұтыну құрылымы салауатты бағытқа бет алды

Дегенмен, соңғы уақытта азық-түлік себетінің құрамында сауықтыру тенденциясы байқалады: егер сатып алу жиілігіне қарай бағаласақ, тәттілер мен шоколад өнімдері екінші орынға түскен (33%), бірінші орынды сусындар (43%) иеленіп отыр, ал сүт өнімдерінің үлесі 30%-ға жетіп, тәттілермен шамалас деңгейге көтерілген.

Нан мен жеміс азайған

Аналитикалық мәліметтерге сәйкес:

• нан және тоқаш өнімдері 2024 жылы чектердің шамамен 23%-ында кездессе, 2025 жылы бұл көрсеткіш 20%-ға дейін азайған;
• жемістер де сирек сатып алына бастаған – былтыр 10,6% болса, биыл 9,4%-ға түскен.

Азық-түлік себетінің жаңа бейнесі

Жалпы алғанда, Қазақстанда азық-түлік тұтыну мәдениеті салауатты бағытқа қарай өзгеріп келеді:

• тәттілер мен газдалған сусындар бұрынғысынша танымал болғанымен, олардың үлесі біртіндеп азаюда;
• сүт өнімдері мен етке сұраныс артуда;
• көкөністердің үлесі жыл бойы тұрақты деңгейде сақталуда, маусымдық өзгерістерге байланысты сәл ауытқиды.

Сарапшылардың пікірінше, бұл қазақстандықтардың тамақтану әдеттерінің сапалы өзгерісін көрсетеді — тағам рационы енді біртіндеп «тәтті және фастфудтық» сипаттан «ақуызды әрі табиғи» бағытқа ауысып жатыр.