«Жеңілдетілген ипотека алып беремін»: Астанада алаяқтардың тағы бір қулығы әшкере болды
Ол өзінің көмегі үшін 2 млн теңге талап еткен
Астанада полицейлер «жеңілдетілген ипотекаға көмектесемін» деген желеумен жасалған алаяқтық дерегін ашты, деп хабарлайды Azattyq Rýhy.
Астана тұрғыны полицияға арыздана отырып, алаяқтың құрбаны болғанын хабарлаған. Оның айтуынша, таныс әйел мемлекеттік жеңілдетілген тұрғын үй бағдарламаларының бірі арқылы несие алуға көмектесуге уәде берген. Жәбірленуші барлық қажетті құжат пен өтінімді алдын ала дайындаған, оны алаяқ өз пайдасына пайдаланған.
Әйел өзінің «байланыстары барын» және несиеге кепілдендірілген мақұлдауын алатынын айтып, «көрсеткен қызметі» үшін 2 миллион теңге талап еткен. Ақшаны алған соң байланысқа шықпай қойған.
«Полиция күдіктіні ұстап, алаяқтық фактісі бойынша жауапкершілікке тартты.
Құқық қорғау органдары азаматтарға ескертеді: «жеңілдетілген бағдарламаларды» немесе несиелерді «жылдам рәсімдеуді» уәде ететін делдалдардың сөзіне сенбеңіздер. Барлық мемлекеттік бағдарламалар қатаң белгіленген тәртіппен және үшінші тұлғалардың араласуынсыз жүзеге асырылады», – делінген Полиция департаментінің хабарламасында.
