Үндістанда шығарылған дәрі Қазақстанда сатылған ба: Денсаулық сақтау министрлігі мәлімдеме жасады

Денсаулық сақтау министрлігі Медициналық және фармацевтикалық бақылау комитеті Дүниежүзілік денсаулық сақтау ұйымының (ДДСҰ) жөтелге қарсы кейбір сироптардан улы заттар табылғаны туралы мәлімдемесіне жауап берді, деп хабарлайды Azattyq Rýhy.

Комитеттің ресми сайтындағы ақпаратқа сүйенсек, ДДСҰ үш түрлі жөтелге қарсы сиропта – Coldrif, Respifresh TR және ReLife препараттарында улы диэтиленгликоль заты анықталған. Бұл сироптарды Үндістанның Sresan Pharmaceuticals, Rednex Remedies және Shape Pharma компаниялары өндірген.

«Дәрілік заттар мен медициналық бұйымдарды сараптау ұлттық орталығы хабарлағандай, аталған препараттар Қазақстан Республикасында мемлекеттік тіркеуден өтпеген және оларға сәйкестік сертификаттары берілмеген», – делінген хабарламада.

ДДСҰ дерегінше, бұл препараттарды қолдану денсаулыққа, әсіресе балаларға, елеулі қауіп төндіреді. Диэтиленгликоль – ағзаға түскен жағдайда ауыр улану мен жедел бүйрек жеткіліксіздігін туғызуы мүмкін улы химиялық қосылыс.

Мамандар азаматтарды дәрі-дәрмекті тек лицензиясы бар дәріханалардан сатып алуға және аталған сироптарды қолданудан бас тартуға шақырды.