Мәжілісте МИБ төрағаларына жаңа өкілеттіктер беру мәселесі талқыланды

Мәжіліс депутаты, «AMANAT» фракциясының мүшесі Екатерина Смышляева «МИБ төрағаларына құқық қорғау сипатындағы өкілеттіктер беру қисынды ма?» деген сұрақты Палата отырысында көтерді, деп хабарлайды Azattyq Rýhy. 

«Құқық бұзушылықтардың профилактикасы туралы» заң жобасында мүлік иелері бірлестіктерінің (МИБ) төрағалары құқық бұзушылықтардың профилактикасына қатысатын субъектілер қатарына енгізіледі деп көзделген. Оларға азаматтардың мінез-құлқындағы немесе іс-әрекетіндегі қауіп деңгейін бағалау құқығы берілуі мүмкін.

Алайда, депутат Смышляева жаңа функциялар тұрғындармен қақтығыстар мен жеке өмірге араласу тәуекеліне алып келуі мүмкін екенін айтты.

«МИБ төрағалары – бұл тұрғындар сайлаған азаматтық тұлғалар. Олар үй шаруасын ұйымдастыру және басқару міндеттерін атқарады, бірақ құқық қорғау саласының мамандары емес. Мұндай өкілеттіктер МИБ қызметінің азаматтық-құқықтық табиғатынан тыс шығып кетеді», – деді депутат Мәжіліс отырысында.

Смышляеваның пікірінше, бұл нормаларды енгізу тұрғын үйлер ішінде жанжал мен теріс пайдалану жағдайларын тудыруы ықтимал.

«Бұл тұрғындардың жеке өміріне араласуға алып келмей ме? МИБ төрағалары өз көршілерімен жиі қақтығыстарға ұшырамай ма?» – деп сұрады депутат.

Ішкі істер министрі Ержан Саденов түсіндіргендей, бұл бастама МИБ-ке құқық қорғау органдарының функцияларын беру емес, қоғамдық тәртіпті сақтауға тұрғындардың қатысуын арттыру екенін айтты.

«Олардың қатысуы қоғамдық бақылау шеңберінде жүзеге асады. Бұл – тұрмыстық мәселелер: түнгі уақытта шудың алдын алу, қоқыс тастау, ауланы күтіп ұстау сияқты жайлар. Біз өкілеттіктердің шегін нақты айқындау қажет екенін түсінеміз, сондықтан асыра пайдалануға жол берілмейді», – деді министр.

Саденов сонымен қатар, заң жобасы қабылданғаннан кейін ІІМ халық арасында түсіндіру жүргізетінін, азаматтар МИБ өкілдерінің құқықтары мен міндеттерін біліп, құқық бұзушылықтардың алдын алу ісіне заң аясында қатыса алатынын атап өтті.