Неміс ғалымдары қарттық қашан басталатынын анықтады

Германияның зерттеушілері қарттықтың нақты неден және қашан басталатынын анықтады. Зерттеу Aging-US журналында жарияланды, деп хабарлайды Azattyq Rýhy.

Адам ағзасында жыныстық жетілуге дейін рибосомалық ДНҚ (рДНҚ) белсенді жұмыс істейді. Бұл геном бөлігі жасушаның өмір сүруі үшін маңызды. Алайда жетілу кезеңінен кейін рДНҚ белсенділігі төмендеп, жасушалық қартаю механизмдерін іске қосады.

Ғалымдар 0-ден 18 жасқа дейінгі 280 адамның қан үлгілерін зерттеді. Екі көрсеткішке назар аударылды:

• рДНҚ көшірмелерінің саны;
• олардың метилдену деңгейі, ген белсенділігін төмендететін химиялық белгі.

Балалар мен жасөспірімдерде белсенді рДНҚ көшірмелерінің саны азаймай, керісінше сәл арта түсетіні анықталды. Бұл жасушалардың жастық күйін сақтап қалуға тырысатынын білдіреді.

Ересектерде жағдай өзгеше:

• белсенді рДНҚ көшірмелері азаяды,
• ал метилдену деңгейі жоғарылайды.

Ғалымдардың пікірінше, бұл өзгерістер жасушалық қартаюдың нақты биомаркері.

«Біздің деректеріміз жас ағзаларда рибосомалық ДНҚ белсенді күйде сақталатынын көрсетті. Бұл жасуша жастығын қорғаудың табиғи механизмі болуы мүмкін», - дейді зерттеу авторлары.

Зерттеу нәтижелері биологиялық қартаюдың үздіксіз емес екенін дәлелдейді: ол жыныстық жетілуден кейін ғана белсенетін табиғи процесс. Бұл жаңалық ғалымдардың қартаюға көзқарасын өзгертуі мүмкін. Енді зерттеушілер қартаю салдарымен күресудің орнына, жастық шақта белсенді болатын қорғаныс тетіктерін күшейтуге басымдық беруді ұсынады.