Сыртқы істер министрі Қатар халқына көңіл айтты
Шарм-эш-Шейх маңындағы жол апатында үш дипломат қаза тапты
Қазақстан Республикасының Сыртқы істер министрі Ермек Көшербаев Қатар мемлекетінің премьер-министрі – сыртқы істер министрі шейх Мұхаммед бен Абдулрахман Әл Таниға көңіл айту жеделхатын жолдады. Бұл туралы ҚР СІМ-нің баспасөз қызметі хабарлады, деп жазады Azattyq Rýhy.
Қаза тапқандар бейбітшілік ісіне үлес қосқан
Хатта Ермек Көшербаев Қатар Әмірі кеңсесі қызметкерлерінің Шарм-эш-Шейх қаласы маңында жол-көлік апатынан қаза болуына байланысты Қазақстан халқының және өзінің шынайы көңілін білдірген.
Министр марқұмдардың аймақтық бейбітшілік пен тұрақтылықты қамтамасыз ету ісіне қосқан зор үлесін атап өтті. Сондай-ақ ол Қазақстанның Қатармен арадағы стратегиялық серіктестікті жоғары бағалайтынын жеткізді.
Апат Египетте, Газа мәселесі жөніндегі келіссөз алдында болған
Бұған дейін Египетте, Шарм-эш-Шейх маңында Қатар делегациясы мінген көлік апатқа ұшырағаны хабарланған. Делегация құрамында премьер-министрді Газа секторындағы жағдай жөніндегі келіссөздерге ертіп жүрген дипломаттар болған.
Апат салдарынан Қатардың үш дипломаты қаза тауып, тағы үш адам ауыр жарақат алған.
