Алғашқы АЭС атауы байқауына 27 мыңнан астам адам қатысты
eGov Mobile арқылы өтініш қабылдау аяқталды
Қазақстанның алғашқы атом электр станциясына атау беру байқауына 27 мыңнан астам азамат қатысты, деп хабарлайды Azattyq Rýhy Атом энергетикасы жөніндегі агенттіктің баспасөз қызметіне сілтеме жасап.
Байқау 25 қыркүйекте eGov Mobile қосымшасында басталып, 10 қазан түнгі 23:59-да аяқталды. Осы уақыт аралығында қазақстандықтар 27 мыңнан астам нұсқа жолдаған.
«Азаматтардың белсенділігі халықтың атом энергетикасын дамытуға деген зор қызығушылығын және ел үшін маңызды жобаларға үлес қосуға дайын екенін көрсетті», – делінген агенттік хабарламасында.
Ұсыныстар сарапталуда
Қазіргі уақытта барлық ұсыныстарды өңдеу және жүйелеу процесі жүріп жатыр.
- Бірінші кезеңде мамандар атауларды талдап, жиынтық есеп дайындайды;
- Кейін бұл материалдар конкурс комиссиясының қарауына жіберіледі;
- Қорытынды отырыс қазан айының соңында өтіп, нәтижесінде АЭС атауы бекітіледі.
Мемлекет пен қоғамның ашық диалогы
Атом энергетикасы агенттігі байқаудың маңызын атап өтті.
«Бұл бастама – мемлекет пен азаматтық қоғам арасындағы ашық диалогтың нақты мысалы. Байқау ел тұрғындарының белсенді азаматтық ұстанымын айқын көрсетті», – делінген хабарламада.
