Боран мен көктайғақ: Павлодар-Астана тасжолы жабылды (ВИДЕО)

Павлодар облысында ауа райының күрт нашарлауына байланысты Павлодар – Астана бағытындағы жол жабылды, деп хабарлайды Azattyq Rýhy өңірлік полиция департаментіне сілтеме жасап.

Полиция мәліметінше, жолдың жабылуына қар аралас жаңбыр мен көктайғақ себеп болған.

«Ауа райының қолайсыздығына, яғни жауын-шашын мен көктайғақтың пайда болуына байланысты облыс аумағындағы республикалық маңызы бар жолдарда қозғалыс уақытша тоқтатылады», – делінген хабарламада.

Жүргізушілерге ескерту

Полиция жүргізушілерге алдын ала маршруттарын жоспарлап, ауа райындағы өзгерістер туралы SMS-хабарламалар мен ресми ескертулерге назар аударуға шақырады.

• Егер жол жабық болса – сапарға шықпаңыз;
• Көлік қозғалысы кезінде жылдамдық пен арақашықтықты сақтаңыз;
• Көктайғақта тежегішті кенет баспау ұсынылады;
• Ауылдық жерлерде тұратын тұрғындарға алыс жолға жаяу шықпау ескертіледі.

«Жүргізушілерге барынша сақ болып, алыс сапардан бас тартуға кеңес береміз. Жолда қалып қойған жағдайда 112 немесе 102 нөміріне хабарласыңыз», – деп мәлімдеді облыстық полиция департаменті.