Павлодар облысында алтын мен күміс заңсыз өндірілгені анықталды
Прокуратураның тексерісі нәтижесінде бірнеше заңбұзушылық әшкереленді
Павлодар облысында жер қойнауын пайдалану саласында заңсыз әрекеттер анықталды. Прокуратура жүргізген тексеріс нәтижесі алқа отырысында қаралып, бірқатар компанияның лицензиясыз кен өндірумен айналысқаны белгілі болды, деп хабарлайды Azattyq Rýhy.
«IBM Gold» экологиялық рұқсатсыз алтын мен күміс өндірген
Баянауыл ауданында орналасқан «IBM Gold» ЖШС осы жылдың басынан бері экологиялық рұқсатсыз алтын мен күміс өндіру жұмысын жүргізген.
Сонымен қатар, өңірде жер қойнауын заңсыз пайдаланған тағы 11 кәсіпорын анықталды.
Кей компаниялар келісімшартсыз жұмыс істеген
Тексеру барысында 8 жағдайда пайдалы қазбаларды өндіру келісімшарттық аумақтардан тыс жүргізілгені белгілі болды.
Бұдан бөлек, келісімшарт мерзімін заңсыз ұзарту және рұқсатсыз өндіру көлемін ұлғайту фактілері тіркелген.
Прокуратура бақылау тетіктерін күшейтеді
Прокуратура алқасында жер қойнауын пайдалану саласындағы мемлекеттік бақылаудағы кемшіліктер талқыланды. Жиынға жергілікті атқарушы органдар, экологиялық және салықтық бақылау құрылымдарының өкілдері қатысты.
Кеңес қорытындысы бойынша жер қойнауын заңсыз пайдаланудың алдын алу және жауапкершілікті күшейту шаралары қабылданды.
Барлық заңбұзушылық бойынша іс жүргізу шаралары қолға алынады
Прокуратураның мәліметінше, анықталған деректер бойынша іс жүргізу және қылмыстық-құқықтық шаралар қабылданады.
Мамандар бұл шаралар жер қойнауын заңсыз пайдалануға жол бермеу және табиғи ресурстарды қорғау жүйесін күшейтуге бағытталғанын атап өтті.
