Аймақта «Отбасы – зорлық-зомбылықсыз» акциясының қорытындысы шығарылды
Павлодар облысында ауыл тұрғыны ұлының ішіп алып, жанжал шығаруына байланысты полицияға арызданды, деп хабарлайды Azattyq Rýhy.
Павлодар облысының полицейлері отбасылық-тұрмыстық қатынастар саласында жасалатын қылмыстар мен құқықбұзушылықтардың алдын алуға арналған «Отбасы – зорлық-зомбылықсыз» акциясын қорытындылады. Акция аясында тұрмыстық зорлық-зомбылықтың алдын алу, қолайсыз әлеуметтік ортада жүрген отбасылар мен балаларға көмек көрсетуге бағытталған іс-шаралар ұйымдастырылды.
Іс-шара барысында сотпен ерекше талаптар қойылған және қорғау нұсқамасы шығарылған шамамен 1,5 мың адам тұрғылықты жері бойынша тексерілді. Акция кезінде полицияға тұрмыстық зорлық-зомбылық фактілері бойынша 50 хабарлама мен арыз түсті.
Жәбірленушілердің қауіпсіздігін қамтамасыз ету үшін 72 қорғау нұсқамасы шығарылып, сот құқықбұзушыларға қатысты 15 ерекше талап белгіледі. Оның ішінде 13 жағдайда спирттік ішімдіктерді ішуге тыйым салынды. Әлеуметтік қауіпті жағдайда тұрған бес отбасы полиция бақылауына алынды.
Ауыл тұрғыны ішімдікке салынған ұлының жанжал шығарып, балағат сөздер айтып, тыныштығын бұзғанын айтып, полицияға шағымданды. Бұл іс сотта қаралып, құқықбұзушыға қатысты қорғау нұсқамасы шығарылды. Сонымен қатар, оған спирттік ішімдіктерді, есірткі мен психотроптық дәрілерді қолдануға тыйым салынды. Сот сондай-ақ психологиялық көмек көрсету шарасын тағайындады.
Акция аясында полиция қызметкерлері білім беру ұйымдарында оқушыларға отбасылық құндылықтардың маңызы туралы түсіндіру жұмыстарын жүргізді.