Жалпы, «Таза Қазақстан» бағдарламасы аясында жыл басынан бері облыста 282 381 адам қатысты
Абай облысында «Таза Қазақстан» бағдарламасы аясында экологиялық акциялар жалғасып жатыр. Тазалық шарасына жастар, Полиция департаменті, этно-мәдени бірлестіктер мен үкіметтік емес ұйымдардың өкілдері қатысып, қала шетіндегі Семей-Астана тасжолы бойын қоқыстан тазалады. Қатысушылар қоршаған ортаны қорғауға үлестерін қосып, экологиялық мәдениетті дәріптеудің маңыздылығын көрсетті. Бұл туралы Azattyq Rýhy агенттігі Абай облысы әкімдігінің баспасөз қызметіне сілтеме жасап хабарлайды.
«Шығыс жастары» қоғамдық қорының атқарушы директоры Әліби Әбдірайымов акцияның маңыздылығы жайында пікір білдіріп, тұрғындарды тазалықты сақтауға шақырды.
«Бұл шара Мемлекет басшысы Қасым-Жомарт Тоқаевтың бастамасымен жүзеге асып жатқан «Таза Қазақстан» бағдарламасы аясында жүзеге асырылуда. Акция барысында Семей-Астана бағытындағы қаланың көрікті аймағы тазартылды. Негізгі мақсат – өңір тұрғындары арасында қоршаған ортаны таза ұстау мәдениетін қалыптастыру. Бүгінгі акцияға 50-ден астам адам қатысып, белсенділік танытты. Қаламыздың тазалығы – барлығымыздың ортақ міндетіміз. Тұрғындарды табиғатты аялауға, мұндай шараларға белсене қатысуға шақырамын», – деді ол.
Жалпы, «Таза Қазақстан» бағдарламасы аясында жыл басынан бері облыста 282 381 адам, оның ішінде 13 585 ұйым мен мекеме өкілдері қатысты. Жұмысқа 8558 бірлік техника жұмылдырылды. Нәтижесінде 157 072 аула тазаланып, 49 467 тонна қатты тұрмыстық қалдық полигондарға шығарылды. Облыс бойынша 2443 саябақ пен сквер тазартылып, 1001 ескерткіштің айналасы абаттандырылып, 10 285 шаршы метр тасжол жөнделді. 50 201 ағаш және 7 883 бұта отырғызылды. Сенбілік 16 811 әлеуметтік және өндірістік нысанды, сондай-ақ 2 287 жасанды су қоймасын қамтыды.
Айта кетейік, экологиялық акциялар Абай облысында алдағы уақытта да жалғасын табады.