Астанада экс-дипломат Сәкен Мамашқа қатысты сот шешімі өзгеріссіз қалды
Астана қаласының Апелляциялық соты бұрынғы дипломат Сәкен Мамашқа қатысты апелляциялық шағымды қарады. Сот алғашқы инстанция шешімін өзгеріссіз қалдырды, деп хабарлайды Azattyq Rýhy.
Адвокат Данияр Әділов әлеуметтік желіде сот шешімінің жариялану сәтін бейнежазба ретінде жариялады. Видеода соттың шешімі оқылып жатқаны көрінеді:
«Астана қаласының ауданаралық қылмыстық сотының 2025 жылғы 18 шілдедегі Мамаш Сәкенге қатысты үкімі өзгеріссіз қалдырылсын, апелляциялық шағымды қанағаттандырылмасын», – делінген.
Еске салсақ, 2024 жылғы мамырда Қазақстанның БАӘ-дегі елшілік кеңесшісінің жұбайы Карина Мамаш он жыл бойы тұрмыстық зорлық көргенін жариялаған. Бұл оқиға қоғамда үлкен резонанс тудырған.