Ақмола облысында онкологияға шалдыққан науқас дәрігерлердің қателігін сотта дәлелдеп шықты

Ақмола облыстық соты онкологияға шалдыққан науқас әйелдің көпсалалы облыстық ауруханаға қарсы талабын қанағаттандырды. Ол сапасыз медициналық көмек көрсетілгені үшін моральдық өтемақы өндіруді талап еткен, деп хабарлайды Azattyq Rýhy.

Әйел 2018 жылдан бері облыстық онкодиспансерде есепте тұрған. Осы уақыт ішінде оған ота жасалып, 26 курс терапия жүргізілген. 2020 жылы дәрігерлер сәулелік терапияны қажет емес деп шешкен, ал 2021 жылы науқас көшіп кетуіне байланысты есептен алынған.

Қайта анықталған диагноз

2024 жылы әйелге қайта ота қажет болған кезде тексеру барысында метастаздар анықталды. Бұдан кейін ол медициналық және фармацевтикалық бақылау комитетінің департаментіне шағымданған.

Анықталған заңбұзушылықтар

Сотта айтылғандай, тексеру барысында:

• динамикалық бақылаудың болмауы,
• аурудың сатысын айқындамау,
• онкомаммологқа жолдама берілмеуі,
• науқасты дұрыс жүргізбеу фактілері анықталды.

Динамикалық бақылаудың жоқтығынан сәулелік терапияны дер кезінде жүргізу мүмкіндігі жіберіліп алған.

Сот шешімі

Ақмола облыстық сотының алқасы көпсалалы облыстық аурухананы кінәлі деп танып, науқасқа 1,5 млн теңге көлемінде моральдық өтемақы төлеу туралы шешім шығарды. Сот шешімі заңды күшіне енді.