Toyota Alphard пен Sprinter бақылауда: Қарағандыда такси жүргізушілері көлігінен айырылып қалды

Қарағанды облысында «Құқықтық тәртіп» іс-шарасы аясында өткен рейд барысында екі күн ішінде 24 көлік айыптұраққа қойылды. Полиция заңсыз тасымалдың адам өміріне тікелей қауіп төндіретінін ескертті, деп хабарлайды Azattyq Rýhy.

Қандай көліктер назарда?

Лицензиясыз және техникалық байқаудан өтпеген көліктер басты назарға алынды. Әсіресе жолаушыларды тасымалдауға жиі пайдаланылатын Toyota Alphard, Estima, Honda Elysion, Mercedes-Benz Sprinter, Volkswagen Sharan секілді автокөліктер ерекше бақылауда.

Нәтижелер

Бар болғаны екі күн ішінде 24 көлік айыптұраққа қойылды. Тексеру барысында мынадай заңбұзушылықтар анықталды:

• көлікті заңсыз қайта жабдықтау;
• лицензиясыз жолаушылар тасымалдау;
• техникалық ақауы бар және техникалық байқаудан өтпеген көліктерді пайдалану;
• қауіпсіздік белдігін тақпау, жол белгілерін сақтамау;
• рөлде отырып телефон қолдану.
• Полиция ескертеді

«Мұндай құқық бұзушылықтар – адам өміріне төнген тікелей қауіп. Заңсыз тасымалдың салдары қайғылы оқиғаларға әкелуі мүмкін», – деді Қарағанды облысы ПД патрульдік полиция батальонының командирі Медет Нұрмұханов.

Қайғылы жағдай – нақты дәлел

5 шілде күні Астана – Қарағанды – Алматы тасжолында болған жол апаты полиция ескертуінің айқын дәлелі. KIA Sedona көлігінің жүргізушісі жол ережесін өрескел бұзып, апатқа себеп болды. Автокөлік өртеніп, жеті адам қаза тапты.

Рейдтер жалғасады

Полиция тұрғындарды ескертеді: заңсыз тасымал – өлімге әкелетін қатер. Сондықтан рейдтік шаралар тұрақты түрде жалғасады. Басты мақсат – азаматтардың өмірін қорғау, жолдағы қауіпсіздікті қамтамасыз ету және қайғылы жағдайлардың алдын алу.