Қазақстанда ет, сүт және жұмыртқа өндірісі рекордтық деңгейге жетті

Қазақстан Ауыл шаруашылығы министрлігі 2025 жылғы қаңтар–тамыз айларындағы ауыл шаруашылығы саласының нәтижелерін жариялады. Саладағы жалпы өнім көлемі 3,4%-ға өсіп, 3,6 трлн теңгеге жетті. Бұл — кейінгі жылдардағы ең жоғары көрсеткіш, деп хабарлайды Azattyq Rýhy.

Министрліктің мәліметінше, өсімге мал шаруашылығы да, егін шаруашылығы да үлес қосқан. Мал шаруашылығы өнімдері 3,2%, ал егін шаруашылығы 4% артқан.

Мал шаруашылығындағы өсім

Сегіз айда республикада:

• 700 мың тоннаға жуық ет;
• 2,6 млн тоннадан астам сүт;
• 3 млрд-тан көп жұмыртқа өндірілді.

Жануар басы да ұлғайды:

• ірі қара – 0,2%,
• жылқы – 6,3%,
•  түйе – 4%,
• құс – шамамен 3% көбейді.

Өңдеу өнеркәсібіндегі серпін

Агроөнімді қайта өңдеу саласында да айтарлықтай өсім байқалды. Мәселен:

•  қант өндірісі – 24%;
• ет консервілері – 30%;
• өсімдік майы – 27%;
•  колбаса өнімдері – 8,8%;
• сары май – 15%;
• қышқыл сүт өнімдері – 6,4% артқан.

Инвестициялар мен экспорттық әлеует

Агроөнеркәсіп кешеніне құйылған инвестициялар да өсуде. 2025 жылдың жеті айында негізгі капиталға 516,2 млрд теңге салынды, бұл былтырғыдан 27% көп.

Тамақ өнімдерін өндіруге инвестиция көлемі 119,2 млрд теңгеге жетіп, 42,8% артқан.

Ауыл шаруашылығы министрлігінің мәлімдеуінше, агроөнеркәсіптегі бұл серпін Қазақстанның азық-түлік қауіпсіздігін нығайтып, экспорттық әлеуетін арттыруға жол ашады.