Израиль Палестинаға тиесілі тағы бір аумақты басып алып, өз халқын қоныстандыратын болды

Израиль Палестинаға тиесілі тағы бір аумақты басып алып, өз халқын қоныстандыратын болды. Премьер-министрі Биньямин Нетаньяху даулы E1 қоныстандыру жоспарын қайта жандандырды. Бұл шешім Палестинаның мемлекеттілігін түбегейлі жоққа шығарады деген сынға ұшырады, ал Батыс елдері оны халықаралық құқықты өрескел бұзу деп бағалап отыр. Бұл туралы Azattyq Rýhy агенттігі Euronews-ке сілтеме жасап хабарлайды.

Иерусалимнің шығысындағы ашық аумақтағы құрылыс жоспары 20 жылдан астам уақыт бойы талқыланып келген, алайда бұрынғы АҚШ әкімшіліктерінің қысымымен тоқтатылған еді.

Израиль премьер-министрі Биньямин Нетаньяху палестиналықтар болашақ мемлекетінің негізі болады деп үміттенетін жерлерге өз халқын қоныстандыру туралы құжатқа қол қойды.

«Палестина мемлекеті болмайды. Бұл жер бізге тиесілі... Біз мұрамызды, жерімізді және қауіпсіздігімізді қорғаймыз. Біз қала халқын екі есеге арттырмақпыз», – деді Нетаньяху Иордан өзенінің Батыс жағалауындағы Маале-Адумим қонысына барған сапарында.

Халықаралық құқыққа сәйкес, Израильдің Палестинаға тиесілі аумақтарына оккупациясы заңсыз болып саналады. Өткен жылы БҰҰ Халықаралық соты Израильге Батыс жағалауға және Шығыс Иерусалимге қоныстануды дереу тоқтатуды міндеттейтін шешім шығарған.

Ультраоңшыл қаржы министрі, бұрынғы қоныстанушылар көшбасшысы Бецалель Смотрич бұл шешімді Батыс елдерінің соңғы аптада Палестина мемлекетін мойындау жоспарларына жауап ретінде атады.

«Палестина мемлекеті ұрандармен емес, әрекеттермен жойылады. Әрбір қоныс, әрбір аудан, әрбір тұрғын үй – бұл қауіпті идеяның табытына қаққан тағы бір шеге», – деді министр.

Соңғы апталарда Ұлыбритания мен Нидерландты қоса алғанда бірнеше ел Бецалель Смотричке және ұлттық қауіпсіздік министрі Итамар Бен-Гвирге қарсы санкциялар енгізді. Олар қоныстанушыларды палестиналықтарға қарсы зорлық-зомбылыққа итермеледі және Газаны этникалық тазалауға шақырды деп айыпталды.

Ұлыбританияның сыртқы істер министрі Дэвид Лэмми Х әлеуметтік желісіндегі жазбасында E1 жобасын мақұлдауды «халықаралық құқықтың өрескел бұзылуы» деп атады.

Германия СІМ өкілі Йозеф Хинтерзеер де бұл қадамды сынға алды:

«Федералдық үкіметтің ұстанымы айқын: біз бұл шешімді түбегейлі жоққа шығарамыз. Бұл халықаралық құқық пен БҰҰ Қауіпсіздік Кеңесінің тиісті қарарларын бұзады», – деді ол.

E1 аймағының орналасуы стратегиялық тұрғыдан маңызды, себебі ол Батыс жағалаудың ірі қалалары – солтүстіктегі Рамалла мен оңтүстіктегі Вифлеем арасындағы соңғы географиялық байланыстардың бірі.

Бұл екі қала арасы небәрі 22 шақырымды құрайды, алайда палестиналықтар олардың арасында жүру үшін ұзақ айналма жол жасап, көптеген израильдік бақылау-өткізу пункттерінен өтуге мәжбүр. Нәтижесінде сапар бірнеше сағатқа созылады.