Күдікті қазіргі уақытта уақытша ұстау изоляторына қамалды
БАӘ-ден автокөлік жеткізуді уәде еткен алаяқ жеті қазақстандықты алдап кетті, деп хабарлайды Azattyq Rýhy ҚР ІІМ-ге сілтеме жасап.
Ақтөбеде полицейлер ірі алаяқтық жасады деген күдікпен 36 жастағы жергілікті тұрғынды ұстады. ІІМ дерегінше, ер адам әлеуметтік желілерде «Автобан Дубай» деген атаумен парақша ашып, Біріккен Араб Әмірліктерінен автокөліктерді «тиімді бағамен» жеткізу қызметін ұсынған.
«Қылмыстық әрекеттердің нәтижесінде 7 азамат зардап шеккені анықталды. Жалпы шығын көлемі 50 млн теңгеден асты», – деп хабарлады полиция.
Аталған факті бойынша сотқа дейінгі тергеу басталды. Күдікті уақытша ұстау изоляторына қамалды.